政Whats噏：陳梓維請兼職助理寫錯字　被寸「學歷係咪要低過你」

唔少區議員都會請助理幫手設計海報同擺吓街站，油尖旺區議員陳梓維上任初期就爆出過要求助理應徵者學歷唔好高過自己嘅風波。陳日前（1日）喺社交平台再次請人，招聘短期兼職議員助理，今次雖然就無講明學歷要求，但就畀網民發現寫錯字啊！

陳日前發布招聘廣告，請短期兼職議助，主要職責都係負責議辦日常營運、電腦操作以及資料整理。佢要求助理熟悉電腦文書程式，月薪為5000港元，為期3個月，每周工作大約20小時，工作時間可議，但有可能要假曰工作。咦，等陣先，應該係假「日」而唔係假「曰」喎！亦都有眼利的網民發現到，留言提醒佢寫錯字。

另外，有網民留言寸佢，問「助理學歷係咪要低過你」？又有網民就笑佢又請人？事關陳梓維去年剛上任時並未請到議助，但強調聘請助理偏好無乜學歷嘅人士，因為擔心如果學歷比自己高，會有一種「自我為中心」的感覺。陳又稱自己學歷唔高，希望對方寄嚟嘅履歷能夠以中文書寫，而非英文。

東網網站 : https://on.cc/

東網Facebook專頁 : https://www.facebook.com/onccnews/