尋日同大家推薦咗牛油果髮膜DIY「頭髮乾燥？ 超簡單牛油髮膜DIY」，今日就同大家再推薦多幾款超易整嘅髮膜啦！
香蕉髮膜
唔好以為天氣唔熱頭髮就唔怕曬，唔好話出街，就算室內都有紫外光，唔好好咁保護秀髮，就會比紫外光傷害髮絲！香蕉含有豐富抗氧化劑、維生素C及鎖緊水分，加上簡單材料攪拌均勻就可以為秀髮密集修護啦！
材料：
香蕉 半條
乳酪 1大匙
蜜糖 3大匙
檸檬汁 1大匙
用法：塗於頭髮上約15-20分鐘，然後沖洗乾淨。
蛋黃醬髮膜
估唔到減肥大敵竟然係鎖色聖品！蛋黃醬含有豐富蛋黃、醋及油分滋養鞏固髮絲，仲可以平伏角質層同鎖住染髮色彩。
材料：
蛋黃醬 半杯
蜜糖 2大匙
蘋果醋 1大匙
用法：塗於頭髮上約30-45分鐘，然後沖洗乾淨，想要除頭蝨就要連頭皮都要塗抹均勻。
蛋黃髮膜
早前韓國都好流行呢款髮膜，因為CP值真係好高，唔止可以即時見到補充角蛋白嘅效果，而且材料隨時係屋企都可以搵到。不過唔少網友試咗之後表示雞肋，因為好難清洗，所以都要用到少少技巧架！
材料：
蛋黃 1隻
橄欖油 1匙
牛奶 1匙
用法：基本上材料係1:1:1，首先拌勻蛋黃同牛奶，最後加入橄欖油充分攪拌就可以上髮尾等受損位置，量多就自己再加多隻蛋黃就得。不過因為呢款髮膜質地非常稀，所以上嘅時候要逐少上頭，亦都可以使用浴帽幫助。另外就係沖洗嘅時候可以使用梳子幫助，用偏涼嘅暖水去沖洗，如果唔係蛋黃變熟會殘留係頭髮上面。而最簡單嘅方法就係敷完之後直接加入諼髮素全頭按摩後再用暖水沖洗，最後先用洗頭水洗淨頭皮。
同場加映:頭皮按摩油
想要有健康嘅頭髮，就一定要注意頭皮保養，呢款頭皮按摩油可以3-4日用一次，可以治療頭皮屑，仲可以帶走頭油味! 而按摩頭皮都可以加速頭髮生長，對身體都非常多益處!
材料：
椰子油
檸檬汁
用法：只要將槨子油同檸檬汁用4:1嘅比例充分混合，塗上全個頭皮並輕輕按摩，之後可以照常洗頭。
留言 0