香港美食｜酒店推出小王子主題下午茶
各位小王子粉絲，準備好同小王子一齊展開奇妙旅程未？帝京酒店推出以經典名著《小王子》為主題嘅下午茶，帶你遊歷宇宙，品嚐一系列精緻鹹甜美點，絕對係打卡首選！今次嘅下午茶唔單止將小王子嘅故事情節融入食物當中，仲用咗創意同藝術感，將每個星球、每段旅程都變成可以食嘅藝術品。無論你係小王子嘅忠實粉絲，定係單純想試吓新奇有趣嘅下午茶，呢個體驗都絕對唔可以錯過！
▲ 帝京酒店推出以經典名著《小王子》為主題嘅下午茶，下午茶套餐有5款甜點、4款鹹點及兩款特飲。
▲ 藍莓芝士白朱古力慕絲蛋糕：呢個淺藍色嘅「星球」蛋糕，靈感嚟自小王子嘅B612星球。切開佢，你會發現入面有白朱古力慕絲、藍莓醬、藍莓芝士蛋糕同埋鬆脆餅底，口感豐富又多變。蛋糕上面仲有小王子擁抱玫瑰嘅圖案，真係靚到唔捨得食！
▲ 紅桑子歌劇院蛋糕：呢個粉紅色行李箱造型嘅蛋糕，外層係朱古力，入面有杏仁蛋糕、紅桑子雲呢拿忌廉同埋58%朱古力奶油夾心。微酸嘅紅桑子忌廉完美平衡咗朱古力嘅濃郁，食落細膩又可口。
▲ 檸檬瑪德蓮蛋糕：經典嘅檸檬瑪德蓮蛋糕，外脆內軟，仲帶有淡淡檸檬香。面層淋上黃色朱古力，加埋新鮮檸檬皮，清新感爆棚！仲附有小王子嘅好朋友——狐狸朱古力糖牌，可愛到極！
▲ 雲呢拿香橙慕絲蛋糕：同小王子一齊坐上「書本」飛越雲層，遊歷宇宙！「書本」係朱古力製成，而白雲就係雲呢拿香橙慕絲蛋糕，入面有香橙醬同海綿蛋糕，橙香味濃，口感輕盈又軟滑。
▲ 櫻桃開心果慕絲蛋糕：呢個玫瑰造型蛋糕由櫻桃慕絲、海綿蛋糕同開心果慕絲相間而成，仲有銀箔點綴，更以乾冰營造煙霧效果，記得準備好相機捕捉呢個「仙氣」時刻！
▲ 鴨肝醬脆餅配紅桑子啫喱：鴨肝醬甘香濃厚，配埋紅桑子啫喱凍同餅乾，口感豐富又清爽。酸甜嘅紅桑子啫喱令鴨肝醬嘅味道更加細緻，絕對係味覺享受！
▲ 蟹肉牛油果蓉配脆米餅：小王子曾經遊歷地球，呢款鹹點就以綠色「草坡」呈現。草坡係由新鮮牛油果、牛油果醬、沙律醬同蟹肉混合而成，配搭炸至鬆脆嘅米餅同新鮮蟹肉，味道清新鮮甜，仲好脆口！
▲ 脆炸巴馬火腿芝士薯仔球配鮮香草茄蓉醬：美國薯仔搗成蓉，裹上巴馬火腿粒、Mozzarella芝士同巴馬臣芝士，炸至金黃色，外脆內軟糯。趁熱食仲有拉絲效果，芝士味濃郁到爆！配埋新鮮番茄同香草調成嘅醬汁，簡直係完美配搭。
▲ 煙三文魚慕絲撻配黑魚籽：挪威煙三文魚混合忌廉芝士、忌廉同奶打成幼滑慕絲，上面仲有黑魚籽點綴。滑溜嘅慕絲同酥脆撻底交織出豐富口感，煙燻味更加為呢款小食增添獨特香氣。
▲ 限定特飲：為咗配合「奇妙旅程」，餐廳仲特別設計咗兩款特飲：The Rose（玫瑰乳酸梳打）同埋The Adventure（甜橙苿莉梳打）。The Rose用玫瑰糖漿、可爾必思、梳打水同紅石榴糖漿調製，夢幻粉紅色調加上玫瑰冰塊同花瓣，香甜又唔膩。The Adventure就用藍色利口酒甜酒、茉莉花糖漿、可爾必思同梳打水調配，搭配細滑忌廉，仲有印有小王子嘅白朱古力片同香橙乾片，香甜帶茉莉花氣息，飲完真係好似遊歷咗地球一圈！
小王子的奇妙旅程下午茶
供應日期：即日起2025年至9月30日
供應時間：15:00 – 17:00
價錢：HK$568/兩位用（包兩杯特飲）; HK$288/一位用（包一杯特飲）
地址：旺角太子道西193號帝京酒店
文字：香港人遊香港