有最美經理人之稱的霍汶希（Mani），曾捧紅不少明星，今日已是英皇娛樂集團營運總裁。她日前於「三八婦女節」成為首位獲邀到麥當勞公司演講的講者，分享成功之道。
Mani分享自己第一份暑期工的經歷，指自己因為年紀最小而經常被「恰」：「叫我攞貨就攞貨，我要徒手爬上去三層高嘅貨架。啲人永遠都係見到我嘅pat pat多，因為我永遠都係推緊貨。」
雖然如此，但當時Mani心中已下定決心有一番作為：「啱啱入行雖然係做緊苦力，但我走嘅時候或者轉行，我希望做到嗰行最優秀嗰個人、或者嗰班人！』呢個係我對自己嘅要求。真係唔係講笑，我走嗰年，我做咗一年咋嘛，我係全個floor嘅第三位，但我賣嘅係junior fashion、好平嘅嘢，我好開心。」
Mani自言「唔安分守己」，她以茶水部作比喻，「就算我係做茶水部，我都想管埋廁所部門啦，係咪都管多幾個部門吖嘛，可能有朝一日可以管埋廚房，總廚都做埋，我係用呢個理念。當你個版圖擴大，你就會自然一級一級咁上。」
Mani在39歲那年，決定跳出舒適圈，主動申請到內地工作，那年正是她經理人生涯的巔峰期，旗下藝人獲得最多獎、工作量最多的時期。但移居北京一個月後便抑鬱起來。除了水土不服，普通話不精亦令她面對不少尷尬場面，「有一次食飯，席上全部都係最大嘅4A公司、Magazine入面最大嘅editor。我對面嗰個係一間4A公司嘅老闆，佢着住一件藍色衫，我又着住藍色衫，冇嘢講起上嚟梗係講自己識講嗰啲國語啦，我就話：『你是不是喜歡男生（藍色）的？』佢擘大咗個口，『是的。』嗰個係男人嚟嘅，原來佢真係鍾意男仔嘅，但佢未出櫃，我真係好尷尬！」她認為去到一個新地方除了要適應當環境、融入當地文化，更要學習。
在跟員工的互動環節中，被問到如何帶領「Gen Z」時，湊過不少藝人的Mani 謂，以前教藝人，藝人的母親十分感謝她，但坦言「教女係最難！」。她認為要在認同他們的同時，亦要啟發他們，給他們選擇。「好似我個女咁，佢唔肯彈鋼琴，佢話：『我唔彈啦。』我話：『小朋友一定要學一個樂器㗎喎，你自己揀啦。』佢話打鼓，打鼓喎，我真係入精神病院。我話：『打鼓都唔錯，但係表姐又拉二胡喎，其實二胡都唔錯。』路係佢自己揀，你不能揀條路俾佢行，你揀條路俾佢行，佢一定唔行！引導，同埋俾幾樣嘢佢揀，揀完之後，你意見接受但一切照舊，用盡自己方法引導返佢揀你自己想揀嘅嘢。」
