請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

生活

佐賀山田✨🥩 |青衣 高質任食 日式燒肉 和牛海鮮甜品💕|

we2log

發布於 2022年05月20日15:01

😚今日去咗接羊先生收工,順便食埋晚餐先返屋企。我哋就去咗青衣城睇吓有啲咩好食。見到有一間好似係新開張嘅任食燒肉火鍋嘅餐廳,睇完餐牌之後都覺得好吸引,所以就揀咗呢一間餐廳食燒肉。除咗燒肉之外,其實都有打邊爐嘅選擇。佢哋餐廳就分咗兩邊,一邊係燒肉,一邊就係打邊爐。

✨我哋今次就揀咗燒肉松放題,諗住咁耐冇見,就食好啲。呢個燒肉放題都真係好多食物既選擇架

🥩肉類:

佢本身就已經跟咗一個雪之燒肉盛❄️,入邊就已經擺咗松放題獨有嘅牛肉特選類別,咁大家就開啲試到各款高質牛肉,佢仲用標籤標示住,咁就更加清楚👍🏻

🤤牛肉黎講,我最鍾意係SRF安格斯和牛牛板腱,一口牛同美國SRF牛肋條。整體牛肉質素都非常之高,會見到啲雪花非常之平均,全部都好Juice,一咬落去就爆汁。呢幾款除咗牛脂重,牛味都非常之濃郁。我哋之後都有係咁encore呢三款嘅牛,好推介俾大家👍🏻💕

🐷豬方面,我哋就最推介豬頸肉俾大家啦,咬落去都係好爆汁,好爽脆,推介!

🐣雞肉方面,其實我哋平時平時食燒肉都好少食雞嘅,因為梗係想圍返本,所以梗係要瘋狂encore牛啦🤣不過呢度嘅雞都真係令我幾驚喜,特別係華味鳥雞肉丸同埋芝士雞腿肉,仲有雞肉爽。你幾款都係非常之好味,推介俾大家💕!雞肉食得出用左好少粉漿,肉質好嫩滑同埋咬落去就係好juicy, 真係食多幾粒都唔怕。芝士雞腿肉就係用咗一個錫紙兜裝住再擺喺燒烤爐上邊烤熟,芝士味雖然唔係好濃郁但係都有拉絲效果,最鍾意係佢嘅雞腿肉真係好嫩🫠

⚠️呢度除咗有原味嘅肉類選擇之外,仲有唔同醃料嘅肉作選擇大家可以跟返自己嘅喜好,食咗原味,之後再食醃料味嘅肉。原味繼續用返鹽同埋醬油已經好夠味,可以食得出食材本身嘅鮮味,之後再可以試吓醃料嘅肉,轉變下口味😆👍🏻

🦐呢度仲有好多唔同海鮮嘅選擇,有燒廣島蠔,蜆,帶子,海蝦,鯖魚,海蝦,仲有甲羅燒添呀😍!海鮮就真係要瘋狂encore啦!蜆,帶子,廣島蠔,都係用錫紙兜裝住再落咗牛油擺喺燒烤爐上邊燒。味道真係好鮮甜同埋雖然係冰鮮但係就冇雪藏味,廣島蠔更加係好creamy好Juice仲要脹卜卜好大粒🫣🫣!海蝦都幾彈牙同埋幾大隻嘅。仲好記得喺日本嘅時候食甲羅燒真係好好味,估唔到呢度都有機會食。佢一件都俾咗非常之多嘅蟹膏仲有蟹肉,十級鮮味,真係好想攞嚟撈飯🤣

🥬蔬菜類方面呢度都有好多唔同嘅種類例如牛油金菇,牛油本菇,牛油蘆筍,菠蘿,仲有大啡菇添啊。我自己最鍾意就係燒蘆筍同埋本菇,因為蘆筍完全無渣,好嫩🤤

⚠️除咗用電話落order嘅食物之外,出面仲有唔同嘅拌飯,可以自己DIY,我見就有啲人整咗溫泉蛋飯,都真係幾正🫠🫠,不過我哋太飽啦。仲有唔同嘅飲品可以選擇例如汽水果汁仲有熱飲。再行過少少就會見到有好多明治牌嘅雪條🍧,例如有乳酪芝士,抹茶紅豆,牛乳雪條等等,真係多到食唔晒佢。再行過隔離就會有各款嘅一口甜品,我自己就最鍾意乳酪芝士同埋Brownie啦,呢兩款質素都幾高,唔會太甜或者太膩。雪條我就揀咗乳酪藍莓,酸酸甜甜,真係好開胃。不過佢都溶得幾快大家就食嘅時候先去攞啦

✨✨尼間燒肉都真係幾推介俾大家,食物種類豐富,用料高質,環境舒適夠乾淨,服務態度都好好,店員仲會介紹點樣燒肉同埋上菜速度都好快,第二轉嘅肉類都唔會話差過第一轉,水準都幾平均。另外一提呢度落單就係用電話落單,數量一係代表一塊肉或者一粒丸,所以大家就揀返適合自己嘅份量啦。不過呢度每款最多都係一人揀一份每次大家就唔好做大嘥鬼啦🫢😄

📍佐賀山田 (青衣)

青衣青敬路33號青衣城1期2樓203號舖

▼ Follow we2log

https://www.instagram.com/we2log/

0 0
reaction icon 0
reaction icon 0
reaction icon 0
reaction icon 0
reaction icon 0
reaction icon 0