四年時間‼️四年前日本由被比利時3比2絕殺，四年後2比1擊倒德國。
E組小組賽德國大戰日本，捲土重來嘅德國對住賽前一致被睇低嘅日本，其實都係另類嘅德甲大戰，因為日本有唔少球員都外流德甲並成為主力，包括係鐮田大地、吉田麻也同遠藤航等球員，因此兩隊對各自嘅球員都較為熟悉。
上半場德國隊佔較多嘅控球時間，但較多時間都係空有控球權，日本隊4-4-2陣式係中路形成包圍網，德國中路未能推進但兩閘嘅出擊力有限，特別係今日踢右閘嘅蘇利((Nikilas Süle)，結果德國只能依賴左路嘅拿姆(David Raum)後上，但同時變成板倉滉同酒井宏樹嘅防守表現機會。直到33分鐘，德國加快節奏轉邊，殺入禁區嘅拿姆cup後被心急出迎嘅門將權田修一撲跌，結果德國獲判十二碼，根度簡主射入網先開紀錄臨完半場前日本嘅防守集中力下降被夏域斯門前撞入，但只係越位在先令日本保住性命。
下半場日本相繼換入富安健洋、三笘薰同淺野拓磨，結果呢一輪調動亦成功製造威脅，特別係德國隊係下半場並未有成功施加壓力，中場面對日本球員拼命嘅攔截搶截失勢，繼而令前線嘅淺野拓磨(Takuma Asano)有更多起腳機會。
70分鐘德國一輪狂攻之下門將權田修一交出四次關鍵撲救，大難不死嘅日本隊再調入堂安律同南野拓實兩名進攻球員，結果75分鐘門將紐亞撲出不遠之時由堂安律(Ritsu Doan)補射入網，追平一比一。83分鐘日本中堅板倉滉一個長傳，蘇利包左越位，淺野拓磨右路落底壓住舒洛達碧克勁射網頂入網，最終日本隊下半場二比一反超德國拿下3分，對佢地小組出線機會大增。
今場日本隊球員係身形同體能上比對手已經不落下風，縱使整體速度上同衝刺力都係差少少，但今日伊東純也係右路嘅活力已經為德國隊增添唔少煩惱，上半場係唯一殺著，下半場佢同淺野拓磨嘅配合更具威脅🥹如今日本3分在手，假設西班牙三場全勝，只要日本隊對哥斯達黎加生生性性，日本有望突破小組賽。
▼ Follow 足球港場頻道
Instagram: https://www.instagram.com/footballarena_hk/
留言 0