實測 On Cloudsurfer 2 | Cloudsurfer 翻身之作?

Cloudsurfer 2 係 On 2025 年新出嘅產品，主題用咗 Soft Wins 仲有老闆費達拿加持同芝麻街 Elmo 拍咗一系列廣告，可見 On 上半年將會主力投放呢個型號。上一代已經係 2023 年 3 月上市，當時係首次用上 CloudTec Phase 中底技術，重新命名為 Cloudsurfer 1，可謂好壞參半。因為第一印象係感覺淋身，唔再有以往踩落鞋嘅偏硬感覺，因為大部分 On 鞋款都嵌有 Speedboard；新型號 Speedboard 大部分都由全掌改為 X 型，減低中底硬身感覺。但好多用家在穿著一段時間後出現中底支撐力不足問題，步行時或會出現聲音。

繼 2024下半年再推出 Cloudsurfer Next 後，Surfer family 係 Road running 就有 3 款 (唔計 Lifestyle 版本 Cloudtilt): Cloudsurfer 2、Cloudsurfer Next 同埋 Cloudeclipse。鞋後踭厚度 32mm，前後掌落差為 9mm，US18，US8.5 重 261g，對比市面上相同定位嘅鞋款例如 Asics Gel-Nimbus 27 / Hoka Bondi 9 / New Balance Fresh Foam X 1080 v14/ Puma MagMax Nitro 約 300g 稍為輕巧。

Cloudsurfer 2 特點

鞋面用上工程網布，對比第一代有更高透氣度，濕熱天氣下都冇太焗身嘅感覺；鞋舌及鞋領位保留厚身設計，為穩定鞋款提供更好包覆感，更舒適。第一個鞋孔是用繩拉扯著鞋頭兩側，加強前掌穩定性。闊腳掌人士今次會係一個福音，鞋楦 true to size，鞋頭偏闊。

中底物料由依舊係使用 Helion Superfoam 搭配 CloudTec Phase。重提多次，CloudTec Phase 係一個中底科技通過電腦計算，以不同型狀同埋斜度嘅 Cloud 雲模塊作緩震同推進，官方指今次稍作升級，會令跑步時會更流暢。跟市場其他慢跑鞋一樣，鞋踭黑色位置亦有加入 TPU 來加強穩定性，始終慢跑時難免用到腳踭接觸到地面。

鞋底亦係密封式，外底依舊係前後腳掌落地嘅位置多了一層橡膠加強耐磨，外底同時有保留分中線，用以平衡落地。

跑後感

筆者係渣打馬拉松前一星期啱啱收到鞋，只係運動場做咗一課 10k easy。開跑前已知 Cloudsurfer 以緩震為主，擔心中底太淋，係泰坦地跑道試跑時會太卸力，所以只以一個較慢嘅 pace 6 分配速開始去感受。約 1k 之後，與其用軟或者淋去形容，我會用 “韌” 。因為在嘗試提速至 5:30/km 期間，並唔需要用上更大力量，只需要保持節奏，已經可以感受到中底提供嘅緩沖同流暢。完成渣馬後 (筆者今次係跑全馬)，整個 easy week 用上 3 次 Cloudsurfer 2 作 recovery run， 因為全馬後，雙腿需要足夠支撐同舒適柔軟嘅腳感作回復跑。未完賽季嘅跑友，筆者就唔建議用呢對鞋嚟練 interval，或強度太高嘅課表，因為緩震太強，似係沙灘上跑步，力量被吸收嘅感覺。

總結

隨著大部份人賽季完結，係休賽期間減低強度做一些簡單運動，讓身體從漫長訓練得到休息期間，呢類型嘅鞋款可以讓大家重拾跑步嘅興趣。日常經常需要步行或站立嘅人亦可以考慮，始終沒有強烈嘅推進感。跑友們或者會問點分 Cloudsurfer 2 同 Cloudsurfer Next，如果係跑者有一定能力，偏好硬身嘅鞋款，特別係課表混合快慢 M pace ±10s 之類嘅練習，相信會更喜歡 Cloudsurfer Next，相反 Cloudsurfer 2 會更適合新手，啱啱想接觸跑步嘅朋友，因為首先要保持運動，避免傷患為首要。

The post 實測 On Cloudsurfer 2 | Cloudsurfer 翻身之作? appeared first on Fitz 運動平台.