新手媽媽 大多都被婆媳問題纏繞！近日，一位新手媽媽於社交平台發文力數奶奶的不是。原來奶奶阻止新手媽媽請陪月，自薦上完10日陪月興趣班，就要求以2萬人工代價陪她坐月。新手媽媽無奈指，奶奶完全沒有幫到手，最後她要靠自己坐月，最慘是「裙腳仔」老公不覺得有問題，母子連成一線，令她覺得孤立無助。
撰文：Clara | 資料、圖片來源：「我的極品四大長老」、SHUTTERSTOCK | 原文刊於《Sunday Kiss》
奶奶上完10日堂收2萬人工做陪月新手媽媽淚崩
近日，一名新手媽媽於facebook專頁「我的極品四大長老」投稿，自爆正遇上婆媳糾紛。這位新手媽媽懷孕前一直同奶奶分居，大家關係不算親密，但亦不是疏遠。直到新手媽媽準備生BB，婆媳糾紛一觸即發。她透露，當時奶奶拒絕她聘請陪月，態度決絕，還指自己會報讀一個為期10日的陪月興趣班，上完堂就會陪她坐月。
奶奶不但要求她付2萬多元港幣作為人工，同時要求多多，令她因此事非常傷心，常常以淚洗臉。「我唔可以要求佢做陪月職責內嘅事情，佢要自由發揮，最後因為呢件事，我變得日喊夜喊。」可惜她老公是個「裙腳仔」，只著她放心讓奶奶照顧她和BB，她坦言根本對奶奶不抱期望。「大前提係連隊友（老公）都唔係奶奶湊大，又唔識煮飯，完全冇湊B經驗，我點會放心？噩夢就喺產後開始……」
發文數奶奶5大罪
新手媽媽經歷10級痛楚，生完BB，人都還未回氣，奶奶就做出幾件激心事。第一，奶奶沒有準備好炒米茶，而是兩手空空去醫院，一心只想探望BB，令新手媽媽深深不忿。「以為佢會關心我？會準備炒米茶？想多了。」第二，奶奶沒有消毒雙手就想抱BB。第三，在新冠肺炎疫情蔓延之際，奶奶在BB面前拉低口罩說話。終於新手媽媽忍無可忍，叫老公提醒奶奶要負責陪月，怎料從無照顧仔女經驗的奶奶根本不懂如何照料坐月中的她，更犯下五大罪。
1. 毫不在意她會否退奶
新手媽媽表示，奶奶下一次來醫院探訪時，依然沒有帶炒米茶，只在港鐵站點心連鎖店買了一盒豉椒排骨飯給她。她表示，自己作為母乳媽媽，好清楚吃豆豉會退奶，但奶奶反駁：「退奶？飲水就冇事。退奶就由佢退。」她聽到之後非常不滿表示：「當時我仲喺張病床上面，聽到佢咁講，真係人都癲。」
2. 擅自拿走她家中的海參
新手媽媽不再指望奶奶會做陪月工作，惟有自己找一些有湊孫經驗的老人家朋友救命，她說：「有時真係識人好過識字，朋友好快就幫我準備炒米茶外，仲幫我發定啲海參放雪櫃備用同煲上奶湯畀我，我終於覺得人間有愛。」新手媽媽從醫院回到家後，奶奶突然到訪她家，不但沒有準備月子餐、薑水等給她坐月需要的食療，還擅自拿走朋友為新手媽媽準備好的海參回家，令她相當無奈！「我以為自己被人打劫，自此之後，我就冇再見過啲海參。」
3. 想玩B多過湊B
新手媽媽表示，當她餵BB飲人奶時，奶奶不斷拍門，要她開門。「奶奶係咁拍我房門要我畀BB佢玩。」新手媽媽形容奶奶就好像大爺一樣，全日一直抱著BB坐在梳化，動也不動。
4. 沒有幫忙做家務
新手媽媽話坊間指坐月中的媽媽不能碰到生水，但因為老公只能放一星期假陪她坐月，之後的日子要靠她自己洗奶樽、做家務，奶奶全程冇幫到手。「只有我自己落手做。」
5. 沒有用心準備月子餐
新手媽媽話，雖然奶奶之後有落手煮一些月子餐，沒有再買飯盒，但月子餐通常只有四種食物：白烚豬肉、烚菜芯、街市預先醃好用嚟BBQ嘅雞翼、一壺清如水嘅湯。
後悔嫁錯人 網民留言：太懦弱
新手媽媽抱怨老公冇用，覺得奶奶一啲問題都冇，令她自覺「嫁錯人」。「自問自己係用意志力嚟坐月，我都只係慨歎自己嫁之前，冇查清楚隊友嘅底細，到底隊友有幾愛佢阿媽？」帖文一出，引來大批網民留言回應，不少網民覺得新手媽媽太懦弱。「一開始就唔應該退讓，身體係你自己，坐月坐唔好，最後受嗰個係自己。」「單親都可以好幸福……媽媽唔好委屈自己，唔值得。」「我唔明做人做到咁委屈做咩，仲要偷嘢啊，報警啦！大姐，你唔企硬，佢下次連你個B都偷偷抱埋去玩。」「自己唔強硬啲出聲，講乜都冇用。」
另外，有網民指她奶奶與老公都信不過。「遇到啲咁嘅奶奶，咪自己畀錢請陪月囉，使乜理佢畀唔畀請啫，又唔係佢畀錢要靠佢養！」「老公出聲就問佢，你冇份陀、冇份生、冇份坐月，點解係你決定唔係我？」「一開始就作出錯誤抉擇，見到媽寶就應該say goodbye。」「樓主唔記得喺隊友面前加個豬字。」
留言 0