天氣咁涼爽，加上holiday mood，最適合去行山打卡！所以今次為各位姊妹介紹三條簡易行山路線，呼吸下新鮮空氣。今次介紹嘅全部都係一粒星，即係非常之容易行！基本上1小時內已經可以行完。
1.大美督家樂徑
呢一條路線只係有1公里嘅距離，啱晒短短地唔想行足一日的朋友！雖然佢得1公里，但係喺呢段路入邊已經有四個觀景台，一邊慢慢行一邊可以欣賞下風景影相打卡！絕對係行山新手嘅首選！不過沿路有啲位都幾大風，就算戴住口罩，塊面都好易爆拆，大家記得搽好cream先出發！
起點：可乘搭公共交通工具前往「大美督」巴士總站，向船灣淡水湖主壩方向步行約5分鐘，可達白普理賽馬會青年旅舍旁起點。
九巴路線 – 75K及275R (275R只於星期日及假日行駛。)
專線小巴路線 – 20C及20R
終點：沿路步行回「大美督」巴士總站乘車離去。
2.河背水塘家樂徑
呢一條路線沿途全部都十分平坦，冇太多梯級或者斜坡位。相對來講比較容易行亦都比較安全。沿着河背水塘行輕輕鬆鬆就可以睇到十分美麗嘅風景，呢度更加曾經被選為香港郊野十景之一！呢度陽光十分充足，鍾意影相嘅姊妹不妨嚟呢度影吓相，捕捉女神光，要注意做好防曬！
起點：可乘搭公共交通工具前往河背村，由河背村步行約30分鐘前往河背水塘家樂徑。
專線小巴路線 – 71
終點：終點與起點相同。
3.北潭涌自然教育徑
呢一條行山路徑亦都係比較平，同樣啱晒行山新手！如果想同屋企人行都冇問題，因為沿途教育徑會有資訊牌介紹一啲環境同埋生物，啱晒小朋友！蚊蟲比較多，帶定大人細路都啱用嘅蚊怕水就fit晒！
起點：可乘搭公共交通工具至「上窰」巴士站，沿大網仔路步行約3分鐘到達復興橋，或乘專線小巴於復興橋下車，此為起點。
九巴路線 – 94 及 96R (96R只在星期日及公眾假期行走。)
專線小巴路線 – 7 及 9
終點：由上窰沿路折返大網仔路復興橋
以上為網上圖片
留言 0