早前有網民網上發文，稱乘坐Uber時遇到疑似沈震軒的司機，引起外界關注。沈震軒今日（1日）就在IG上發佈了一段影片親自回應，表示自己做Uber司機純粹只是因為喜歡駕駛，亦希望可以幫補一下隧道費。
沈震軒今日分享一條「回應各位！多謝關心」為題的2分鐘影片，身穿白色上衣的他坐在車內談到：「Hello大家好，首先我想喺呢度回應，因為知道有好多人在網上討論我或者見到我，我都唔知道會搞到咁多新聞出咗嚟，真係唔好意思，但我真係好感恩收到好多人嘅鼓勵同埋支持。」
沈震軒表示：「呢幾年我最主要嘅工作係，管理自己嘅健身房，同埋我又開始做幕後嘅工作，就係一個劇本嘅創作，因為相對我以前淨係做演員，我而家做緊嘅嘢係新嘅工作同埋新嘅挑戰，講真真係好大壓力，所以我減壓嘅方式就係我鍾意揸車，咁我鍾意揸車平時揸車嘅路線大部份都係淨係返舖頭健身房。」
沈震軒續道：「有陣時就揸車去開工，嗰陣時我就諗我咁鍾意揸車，不如就登記埋個平台，有人幫你預設個路線，如果咁好彩可以撞到一啲粉絲或者唔同嘅乘客，可以同佢哋傾吓偈，一邊又可以揸車一邊又可以幫補吓啲隧道費，咁都幾好！」
沈震軒又透露兩年前投資七位數開健身房。「不過講真嘅我之前用咗七位數去投資一間健身室，第一次做老闆第一次創業投資一定好大，加上呢幾年嘅經濟真係麻麻地，的確好大壓力，我成日喺度諗有咩可以做多啲幫到生意？可以做到啲乜嘢呢？真心我覺得做生意一定要需要時間。我哋嘅健身房僅僅可以做到收支平衡，但因為投資大，所以到而家都未回本。
沈震軒坦言：「作為老闆嘅我點樣都好，我冇糧出，但係我哋嘅員工一定要準時出糧，我從來冇諗過放棄呢盤生意，我同大家一樣都係為理想繼續努力嘅人。」最後，他亦勉勵各位若遇到任何高高低低，一定要身體健康，努力去解決問題。