陳健安獲逾百族人慶生　親手刨西瓜冰勁寵粉

歌手陳健安（安仔）明天（15日）正日生日，日前他獲歌迷會「本原族」逾百族人慶生，兼慶祝歌迷會成立三周年。向來寵粉的安仔在生日會上狂送禮物和海報，又落場一齊玩遊戲兼親手刨西瓜冰給粉絲品嘗，還自帶喇叭首唱新歌《額頭有字》，讓「族人」先聽為快。

安仔見到粉絲聚首一堂，開心表示：「歡迎新『族人』，亦多謝一直支持我嘅舊『族人』，我哋嘅相遇永遠都係不遲不早。唔使擔心好遲先認識我，最緊要有認識。好多謝你哋嘅愛，我會繼續做好多作品，希望我唱歌每次都有進步。」他又感激族人為他的生日花盡心思：「我好開心！一入場見到啲布置好靚，一年靚過一年，佢哋知我喜歡嘅嘢都整晒出嚟。我都精挑咗好多夾嘅公仔送畀大家，以Sweet為主題，例如一對對嘅公仔或者甜品系列，亦有我割愛嘅Chiikawa特別版和神秘禮物，希望大家鍾意。」

講到生日正日如何慶祝，安仔透露會去踢足球，至於生日願望，他說：「鍾意夾公仔嘅朋友，包括我，順利夾到想夾嘅嘢。我繼續做歌、唱歌繼續進步。大家身心健康，自在寫意！（開演唱會呢？）單飛至今都有廿幾卅首歌，近年又多咗啲新歌。上次喺麥花臣開咗4場，但都有歌迷話買唔到飛，希望喺更大嘅場地開騷。呢個唔只生日願望，係目標。」

東網網站 : https://on.cc/東網Facebook專頁 : https://www.facebook.com/onccnews/