九龍城寨｜「四仔」張文傑是張家輝堂弟　16歲由契媽楊盼盼介紹入行

電影《九龍城寨之圍城》氣勢凌厲，票房已超過6300萬，登上香港電影史上華語票房第5️位。電影中，除了「信一」劉俊謙彈出成為「國民老公」，戲中長期戴著面罩的「四仔」張文傑（German），亦被網民大讚他有真功夫，又Man又型。

事實是張文傑從小已接觸武術，爸爸是圈中著名舞台特技人張孝慈「佐治」，16歲入行後曾為不少演員做替身，繼而進身成為動作指導，09年轉型成為演員。

張文傑接受「24味」的網台節目《24/7TALK》訪問時，談到自己的背景及入行經過。張文傑提到不少經典的電視表演，包括台慶「肥姐踩雞蛋」、「吳剛食炭」，《歡樂滿東華》的「楊盼盼踩鋼線」，全都由其父親及伯伯設計。

German還在訪問中透露，張家輝原來也是他的堂哥：「我哋家族好大，我哋唔算好熟，只係最近幾年我做咗電影行業，見到面、傾返偈，我哋先friend返少少。」

German又提到，自己3、4歲開始已跟著爸爸到處表演，又做過飄色。他7、8歲開始習武，學過南拳、洪拳和劍，11歲開始參加武術比賽。他亦曾學過雜技，甚至到內地的雜技團生活：「當時5點起身，一路刷牙，一路拉住一字馬，早餐都未食就要打筋斗。」心口碎大石、飛筷子，飛鞭，他都學過，更曾因為表演喉嚨碎筷子受傷，下巴留疤痕。

German 16歲獲契媽楊盼盼引薦入行做武師，曾與多位出色的動作演員合作，包括樊少皇、張晉等，亦曾為不少明星當替身。他曾因為不甘要為態度差的演員做替身，決心走上幕前做演員：「點解我要幫演員做替身？冇人認同我或者冇人識我，我咁辛苦同你搏命，但係唔係個個演員都真係咁Nice，有時有啲人令我覺得好X嬲，我做乜要幫你？我幫完你，我周身傷佢自己就……我又唔係演唔到。雖然自問唔係靚仔，但都唔係咁差，咁不如試下做演員，當時有呢個心態。」

09年由動作指導轉型做演員初期，German曾經為了擺脫武打形象，刻意推掉動作片工作：「我要話畀人聽我係一個演員！我係識做戲！犧牲好多嘢，因為係好X困難，你冇嘢拍，啲人都唔識你，點會無啦啦搵你做演員？所以我工作都推晒，我要話畀人聽我已經唔係以前嗰個German，我唔係嗰個替身，我係演員。」

German 轉型為演員後，慢慢改變想法，認為替身其實是很專業的工作，又認為近年武師出現斷層，因此於半年前開辦專培訓新一代武師、特技人、動作演員的武術學校。他希望提升這方面的專業，培育新秀，推動香港的特技：「做武師最當打係十幾歲時候，而家嗰班個個都3字頭，呢個行業冇咗呢班人，香港動作片就冇㗎喇。」

View this post on Instagram

A post shared by 張文傑 (@germancheung)