FI專欄｜數碼港洩密風波大拆解｜渾水

第一個要承擔責任嘅，係公關團隊。

數碼港，因為今次洩漏資料風波寫咗一封信俾租戶，他們清楚交代，8月嘅時候一早已經知道有問題，但係就選擇唔公開。

到東窗事發，先施施然話自己一早知。一早知又唔早講，然後寫咗一封擺官威嘅信，受害者梗係嬲多幾錢重。

咁垃圾的公關團隊，炒Q咗佢啦，累人累物。

我哋不妨回歸成件事嘅核心。事情是可以得到解決的，只要一早用錢就可以了。黑客組織要求30萬美金嘅贖金，到底係多定少？

翻查一下年報，數碼港同科學園呢啲不思進取嘅組織，根性都係一樣，同樣鍾意將啲錢擺喺銀行嗰度曬太陽。數碼港有2.9億喺銀行。

再睇返你哋嗰班友嘅人工，你哋一年都出1億糧，30萬美金算係乜嘢？

最高薪酬那5個管理層，一年出超過17,000,000人工。都係同一條問題，30萬美金算啲乜嘢？搵咁多錢養你哋班廢人，關鍵嘅時候唔識做決策，出事淨係龜縮。炒咗佢啦。如果做到嘢嘅，當初就唔使面對300,000嘅兩難。

唔俾呢30萬嘅代價係乜嘢？就係你哋一次過將所有租戶、相關人士嘅個人資料全部攞晒去陪葬，資訊安全大攬炒。未來如果數碼港租戶或者相關人士唔小心俾人哋攞咗啲資料去借錢，或者有好多詐騙電話，大家就知道係邊個出賣你哋。

仲未計歐盟個人資料保護法GDPR，如果有一個歐盟公民去投訴，就算未使你賠錢，你預備定律師團隊同人哋打啦，條數點都大過30萬啦。

我不是IT人，只係創業做過幾個IT項目，係一啲IT項目嘅天使投資人咁解。連我呢啲唔關事嘅人，都知有一樣嘢叫做Security Hacking。

好似呢種黑客入侵，唔係五百年一遇，分分鐘五日一遇都嫌少。

雖然朋友思聰嘅講法係好到位，好易明，但作為管理層，你唔好將件事當成係綁架同撕票嘅關係。

早期區塊鏈同加密貨幣世界未成熟，有好多項目喺編寫智能合約都係有好多bug，項目主係會邀請IT人出嚟幫手做類似的安全性測試。

搵到一個漏洞時，項目團隊係會獎勵返一啲加密貨幣比佢哋。科網圈嘅社群就係咁樣建立，人哋問你30萬美金咁少，你自己標榜數碼科技，咪細細聲填咗條數，當人哋幫你做 External System Upgrade囉，反正漏洞嘅嘢，遲早都要解決，好過而家全部人一齊攬炒。

300,000美金幫你搵到一個資料訊息安全漏洞，好抵啦，你出去搵個顧問分分鐘收多你一個零。利申，唔鼓勵主動hacking，只係討論當件事發生咗，可以有怎樣嘅博弈選擇。

無論30萬係多定少，應唔應該俾，前提係你做好咗資料庫嘅安全管理，就唔會有呢個博弈困難抉擇。件事根本一開始就唔應該發生，完全係管理層和董事局嘅失當在先。你有2.9億擺銀行啊，唔係同我講冇錢做好數據管理安全下話？

再睇返佢哋財政行政董事局嘅構成，大部份人我都唔識。有一個好眼熟，叫冼漢迪。除咗係中手遊呢間公司之外，佢亦都有玩一隻殼股叫做童園國際3830 ，市值唔夠5000萬。

我對呢科嘢都好有心得，寫咗兩本書叫《殼股財技》、《暗黑金融學》。歡迎買返嚟參考一下，或者訂閱我Patreon都得。現在數碼港好大鑊嘢，冼生你似乎責無旁貸，玩殼股呢啲嘢，睇怕要擺埋一邊先

Fortune Insight 聯乘 《華爾街日報》推出全新訂閱計劃「FI Prime Plus」，只需輸入優惠碼「FIP30free」，即可免費一個月暢讀《華爾街日報》全網內容和Fortune Insight大部份收費內容
按此訂閱：https://prime.fortuneinsight.com/web/wsj

Subscribe FORTUNE INSIGHT Telegram:
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen