刀郎疑唱贏Psy世界紀錄　死敵那英被590幾萬人狂轟

神隱10幾年嘅內地歌手刀郎近日推出新歌《羅剎海市》，歌詞被視為暗諷圈中「仇人」那英、汪峰、楊坤及高曉松，事關眾人曾先後批評刀郎嘅歌冇價值、收到刀郎唱片會直接丟進垃圾桶、毫無審美觀點等，大肆劣評其音樂作品，因此今次刀郎新歌借歌詞鬧人，令網友大讚佢用詞精景，為自己出一口氣。《羅》一出旋即大受歡迎，有指其全網點擊已達60億，疑似打破韓國男歌手Psy首神曲《江南Style》43億次嘅世界紀錄，認真威到震！

相反其一眾「死敵」那英、汪峰、楊坤及高曉松咁啱日前就為新一季《中國好聲音》開播造勢，一人拍一條宣傳片，當中那英單人片竟然喺短時間內收到590幾萬網友負評，嚇到官網急急Del post，網友想cap圖都cap唔切。而其他人亦無一幸免，通通有幾十萬負評。而新一季《中國好聲音》雖然已經轉晒四大導師，分別為周華健、薛之謙、劉憲華同潘瑋柏，不過都照樣「中箭」，被網友紛紛用《羅》歌詞「未曾開言先轉腚」作留言嘲諷，節目開播2分鐘，就被網民瘋狂喪鬧致官網立刻關閉評論，都算係史無前例喇。

東網網站 : https://on.cc/東網Facebook專頁 : https://www.facebook.com/onccnews/