【冷帽戴法】寒流下嘅保暖衣物，除咗羽絨好易會變米芝蓮身型，保暖配件亦好易出事，亂戴頸巾會好似冇頸，最重要最重要，戴冷帽果陣稍一不慎，就會好似癌症病患，又或者畀人笑似笠咗個Condom喺頭。今次就為大家整合各種戴冷帽嘅重點，順便教埋大家點揀冷帽！
撰文: K.P.｜圖片來源：Pinterest、網上圖片｜資料來源：YouTube、plain-me｜編輯：海月
【冷帽戴法】戴冷帽嘅3大重點：
1. 露耳是常識
第一大重點，一定要露出耳仔，不理係半露定全露，總知一定要露！如果將冷帽笠到盡，焦點就會完全擺咗喺五官，而普遍香港人嘅輪廓都較淺，好容易會扁口扁鼻咁款。露耳戴法一方面可以增強造型感，仲可以修飾頭部大細，甚至令五官更立體，絕對係重點中嘅重點！
2.露出額頭、瀏海
除咗露耳之外，露出前額亦係另一重點，而近年亦流行將瀏海露出，可以整齊咁擺一邊，亦可以塞入帽內然後拉高露出髪線，呢兩個做法都可以修飾或拉長臉部線條。不過如果閣下髪線太高，露前額會弄巧反拙似光頭，呢個時候可以改以露出髮尾或者鬢角，同樣都會有修飾面型嘅效果！
3.時刻維持冷帽帽型
呢個講法可能有啲空泛，但好多戴帽嘅人都會忽略呢樣嘢，其實無論戴5 Panel Cap、Snapback、紳士帽定冷帽，Keep住個靚帽型真係好重要，下面我會再教大家點去揀冷帽，但喺呢Part想教大家一個反摺嘅短版戴法，除咗可以同時露耳同露前額，變成短版仲會更易Keep住個帽型，尤其冷帽個三角型帽尾，喺視角上係有延伸嘅效果，同女人著高踭鞋會拉長腳線條嘅原理一樣！
兩大揀冷帽注意位：
1.Size切忌太窄
想冷帽戴得好睇，先決條件就係揀尺寸，太寬雖然都唔好睇，但都唔夠太窄嚟得大穫。睇睇下面兩張相示範，似泳帽不突止，老老實實簡直就好似笠咗個Condom喺頭咁！
2.質料要夠挺身
冷帽通常都係分為細線織成棉質，同埋粗線嘅羊毛材質，綜合上面嘅所有條件，香港人嘅面型輪廓都係揀粗線嘅羊毛料，因為相對會較為挺身，亦會較易Keep到帽型。
留言 0