《正義迴廊》破千萬林海峰首度謝票 戴「K字帽」自稱「K先生」

電影《正義迴廊》昨天（11月9日）破千萬票房後，在戲中飾演吳冠峰律師的林海峰，現身高先電影院首度謝票。對於電影好評如潮，認為：「（套戲）依家有個難度，出面講到咁好睇，大家會抱住好高要求入去睇，我覺得要降低要求『呢部戲麻麻地咋！』咁樣去睇會好啲，因為好容易就會得到『唔係出面講到咁好啫！』。」引來觀眾一陣笑聲，林海峰後強調電影非常好看，更期望票房可以更好。

距離香港電影金像獎還有數月，林海峰對電影獲獎有很高期望：「我估佢（套戲）電影頒獎禮都走唔甩，今次有機會可以行下紅地毯。」觀眾立刻給予熱烈掌聲。「等我即刻問導演可唔可以改咗我個『特別演出』做男主角先！」

林海峰作風一向幽默，昨日故意戴上「K字帽」現身，當有現場觀眾察覺到後笑稱：「自己已入圍成為其中一個K先生，畀我會第一時間Cut線啦，100萬喎大佬！如果真係有人打嚟問我要100萬嘅話。仲話『聽日過畀你』等我都試下咁講，咁樣答都幾豪爽。」

電影作品不算太多的林海峰，對上一次演出已是在5年前，他笑言：「我係一部接一部，不過中間隔咗一段時間。」對於接拍這部電影的原因，他表示：「呢部戲嘅劇本真係寫得好好，已經好完整將個角色所有嘅嘢寫晒出嚟，我差唔多照讀照做就可以交代到。唔淨係我，而係任何一個角色都用咗好心機多時間去寫，每個角色都好似背後有個故事，好難得見到有個咁心思細密嘅劇本。」

林海峰前晚第一次到戲院觀賞《正義迴廊》：「拍攝現場我只係接觸到好少場數，所以唔知整體係點，睇完之後就發覺剪得好、音樂好、成個佈局好，係近年難得一見嘅港產片。大家啲時間咁保貴，要專心坐喺度兩個半鐘係冇乜可能，但好嘅嘢就會令到呢個地方將多啲冇可能嘅事變成有可能。」