韓馬利工作狂冷落老公 杜燕歌被叫「韓先生」心裏難受

韓馬利（Mary姐）早前經歷了一場急病，她與結婚30年老公杜燕歌受訪電台節目《舊日的足跡》，大讚老公在她病榻中給予無微不至的照料和安全感。面對住院3星期、昏迷1星期，輕了7公斤的愛妻，杜燕歌每天都為妻子烹調不同的食物親自餵食，又謂太太不懂照顧自己，希望病的是他，令Mary姐十分感動。
Mary姐坦言大病初癒之時接到超多的商演邀請，但她深感擁有健康才會擁有一切，故她學懂了珍惜。她說：「今次病好辛苦，但變成一個祝福，我明白一定有明天，但係明天不一定有我！我以前好驕傲、係工作狂，要別人認同先感滿足，因而冷落咗丈夫，忽略咗佢嘅感受。」Mary姐於節目內更向丈夫表白：「我要向你（杜燕歌）講多謝，謝謝你忍受我，同埋對我付出嘅一切，感激之餘我會改變自己，希望做個合你心意嘅太太。」
兩人更甜絲絲大爆浪漫史，他倆的情緣竟由飲熱鮮奶而起。Mary姐回憶：「當時佢（杜燕歌）從澳洲返香港度假，參加藝人之家嘅活動，嗰次我哋大家喺酒店咖啡室飲咖啡，佢竟然叫熱鮮奶，還一連飲三杯，我心想呢個牛奶仔好奇怪，於是開始對佢感興趣；又覺得佢唔會口花花，好有內涵，從來唔煙唔酒，好乖好靜，我開始留意佢，兩人亦開始寫信同寄錄音帶（給對方），佢又喺聲帶裏唱歌，唱得好似費玉清，我當然（也就）迷上咗佢。」
Mary姐與杜燕歌的婚姻亦由打賭開玩笑開始，杜燕歌憶起依然眉開眼笑：「有一次佢（Mary姐）忽然打電話話要嚟澳洲玩，問我招唔招呼？我話『好，冇問題！』。佢話『如果我嚟澳洲嫁畀你呢！』，我話『你夠膽嫁，我就夠膽娶！』（當時）大家只係講笑，結果變成真！證明我哋心中都有對方。喺澳洲，人人叫我杜老闆，但返到香港有人叫我韓先生，我心裏邊覺得難受，但是亦要放下男人尊嚴忍耐住，因為Mary喺澳洲我嘅餐館，亦係落手落腳咁去幫我招呼人客，甚至幫我洗酒吧、洗廁所，一啲明星架子都冇，我感激萬分！只係老婆太工作狂喇！喺香港對我關注好少。」
杜燕歌又憶述曾為太太送上別出心裁的愛情禮物：「記得結婚10年，我寫咗一首詩送畀佢（Mary姐），掛喺牆上，佢可能冇留意到……我只係希望佢明白我，讀懂我，陪我遊山玩水睇 瀑布、種盆栽……」。老夫老妻，一切的愛都來得簡單直接，聽罷老公愛的宣言，Mary姐亦含情脈脈的回應：「經歷咗呢場大病，老公畀我好大安全感，我希望佢以後都話我知有咩需要，要講出口，我一定會做，我一定要揭開你（杜燕歌）呢一本書……讀識佢！」