MIRROR將於下星期（1月15日）起舉行演唱會，現時各成員忙於綵排，但成員之一AK江𤒹生和演唱會監製莊少榮早前被指在社交平台「放負」，而今日（11日）另一位成員Alton王智德亦在社交平台帖文訴苦，稱自己最近被滋擾，又表示希望粉絲多點發放正能量。
Alton今日在Threads寫了一篇以「我想專心，我決定喺度放低一件事」為題的長文，表示近日的不快事。他寫道：「呢排，我受到滋擾（唔爭論滋擾嘅定義，總之我唔舒服），有啲人嘅價值觀我真係諗唔明，我偷拍你，但我唔會po㗎，我cap你圖，但我唔會po㗎，我po你屋企人，你冇講過話唔得喎！其實有啲嘢應該係由自己個世界出發，嗰啲可能係公德心、禮貌、修養，而唔係由外面個世界出發，冇人知咪得，冇人話咪得，咁係咪即係只要件事冇人知冇人話唔犯法，呢個世界就要容許？」
Alton接連寫道：「我明食得鹹魚抵得渴（做呢行），自己咪主動去減少接觸以上例子嘅機會，但IG係就算你冇follow佢，佢都係可以任意tag 你story。而我每次睇IG都要碌到：又病、又凍親、又做唔到嘢等等。先不論對錯，先不論權利同自由，最簡單就係做完一日野，打開個電話想放鬆吓，但就係一堆呢啲負面嘢（負能量），我都係想睇吓Mirror Time啲story啫，恭喜發財。觀眾們先照顧好自己，再發放你哋嘅熱情，咁樣係咪啱數啲？ 講完！」
帖文一出，不少網民紛紛留言支持Alton，「王勁撐你呀 希望大家有多啲同理心」、「 Alton，完全認同你所講，辛苦你同班兄弟了，每個人都有私隱，都應該被尊重，完全不齒果D人嘅滋擾行為」、「撐你呀德哥！癲覆嘅生態不可決定你心態！」、「先唔講追星禮儀，呢啲根本就係做人基本禮貌。撐你呀Alton!」。亦有不少留言希望Alton別被這些事情困擾，期望他在MIRROR演唱會上表演順利：「德哥，明你感受 期待15號見證你在台上發光發熱」「德仔都要照顧好自己，演唱會一切順利。煩心事唔好想太多」。