由上周末開始，天文台預料一道冷鋒橫過沿岸地區，天氣非常寒冷！週末時唔少人嘅皮褸、羽絨、防風防水褸通通岀動。而今晨（2月21日）大帽山更只錄得0.2度，咁凍嘅天氣亦吸引咗一大班追霜一族，情況係點呢？
入冬後最凍！大帽山朝早跌至0.2度 市民凌晨冒雨睇結霜
強烈季候風正式來襲，香港呢幾日嘅天氣寒冷有雨，今朝（2月21日）天文台總部錄得攝氏7.5度，創咗入冬以來最低氣溫嘅記錄！天文台亦提醒大家，位於高地氣溫顯著較低，有可能會岀現結冰嘅情況！
「真係冷得我騰騰震呀～」天文台嘅資料顯示2月20日下午時分，大帽山錄到低過0.6度，不過低處未算低，今日早上(2月21日)氣溫更跌到得返0.2度。而每逢呢啲凍冰冰嘅時候，都會吸引唔少人上大帽山睇結霜，有唔少「追霜一族」喺凌晨時分冒着風雨上山打卡！
凌晨時分市民冒雨睇結霜
於凌晨時分專程登山嘅市民分享，山上仲未有結霜或結冰情況，但即使喺咁，依然吸引咗唔少人揸車嚟碰下運氣，希望一暏結霜嘅風彩！
無論環境幾惡劣、天氣有幾凍，都無阻攝影發燒友上山睇結霜呢啲咁特別嘅天氣現象～
另一方面，基於疫情同天氣因素，消防救護世界亦喺社交平台發岀貼文呼籲市民乖乖留喺屋企。
仲會凍多3日 周末起天氣回暖
怕凍嘅朋友仔，可能要捱多兩三日了，因為天文台嘅九天天氣預報，顯示星期四前的最低氣溫都仲係單位數，一樣凍冰冰～而周末開始會逐漸回暖，星期四或五應該有陽光。大家呢幾日外出記得着夠禦寒衣物先好岀街呀。
留言 0