畢業生失業3個月終獲聘 人工14K、車程來回3個鐘 應唔應該返住先？

去年全年受到疫情影響，各行各業大受打擊，有不少打工仔成為失業大軍。然而，對2020年的畢業生來說，搵工更是難上加難。日前，有位應屆畢業生於討論區發文，指自己畢業後已失業3個月，日前終於收到offer，但返工遠，來回需時3個鐘，正苦惱應否接受該工作，因此發帖詢問廣大網民的意見。

撰文：經一編輯部｜圖片：Unsplash、中新社｜原文刊於：經濟一週

樓主：失業3個月有offer 人工14k、返工來回3個鐘

日前，有位網民於連登討論區以「有offer 但返工地方好遠」為題發文，表示自己為2020年的畢業生，失業3個月左右。他表示自己居於大西北，早前收到offer，但卻因為返工地點太遠，車程耗時個半鐘，不知道應否接受。

「2020 FG（Fresh Graduate）失業咗3個月左右。前幾日interview，今日收到offer，但坐車去嗰度要個半鐘，中途要轉車，人工14k。應該要接受？」

網民點解話「不了」？

樓主的貼文一出，引起網民踴躍回應。有人認為返工地點太遠，加上人工不算高，不應接受該offer，亦有網民勸樓主「諗下交通時間佔咗你人生幾多個鐘」，又有直言返工個半鐘，來回三個鐘足以從香港出發到台灣。

• 「不了，個半鐘+個半鐘」
• 「半個鐘？5分鐘內返唔到公司嘅工都唔使諗啦！」
• 「咁低，仲要個半鐘，不了。」
• 「諗下交通時間佔咗你人生幾多個鐘」
• 「垃圾工！3個鐘可以去到台灣來回」
• 「車程個半鐘，來回冇咗三個鐘，每日車錢最少都30蚊-40蚊。得14K，唔好玩啦。」
• 「人工已經低，如果連返工距離唯一優點都無，好難說服自己捱一年先。」

網民：返到屋企已經「攰到唔想做其他嘢」

又有網民分享自己的經驗，指車程太長，放工後已經「攰到唔想做其他嘢」。

「之前都試過有個offer係咁，後尾諗諗下都reject咗。用嗰3個鐘可以做到好多嘢，同埋搭咁耐車返到屋企都會攰到唔想做其他嘢。」

• 「如果唔係好等錢使，就唔好返啦，因為真係無晒私人時間。除非公司大，寫落cv好睇，都可以捱一年。如果等錢使就做住先，再積極搵其他工。」
• 「慘過去機場，機場起碼真係遠，但係好pay啲」
• 「太遠真係唔掂，返到個人無晒精神同時間」
• 「我自己通常見到東九龍都唔會報，諗到日日要塞完龍翔道塞屯公都覺得辛苦，仲要九龍灣未必有位坐。」

人工13k、車程2個鐘 比14k嘅offer好？

有網民則比較14k、返工來回3小時的車費，以及13k、每日返工2個鐘車程，並勸樓主作出決定前應想清楚。

14k 每日3個鐘車程、40元車錢 vs 13k 每日2個鐘車程、20元車錢

返20日，Time cost 差20個鐘,，以時薪$85元換算 即1,700元，車錢差400元。即係返14k遠工同13k近工成本相差2,100元，未計早咗起身、遲返到屋企呢啲隱藏嘅心理時間成本，自己諗。

返工來回3個鐘 好過再失業多3個月？

雖然有不少網民認為返工車程太長足以令人卻步，但有人卻認為樓主是畢業生且失業一段時間，可以考慮「做住先」，之後再搵其他更好的工作。

• 「你有屋企人要照顧？一定要早啲返到屋企？又無負擔嘅時候又無個好啲嘅offer、又無工作經驗，點解仲要諗？利申：新界區返中環 來回兩個半鐘車程。」
• 「騎牛搵馬咁，一路做一路搵工。你要記住你已經失業咗3個月，來回3個鐘好過你再失業多3個月。」
• 「返兩日先，頂唔順就即辭，唔使同佢客氣。」
• 「有其他offer你揀？失業咗3個月，車程2個鐘都去試下先啦，又未有其他更好嘅offer，呢個時勢有工返算係咁。」

「我都覺得可以返咗先，一路做一路再搵工，就算扣晒車錢你都仲有至少10k落袋呀！仲有工作經驗呢啲可以幫到你搵下份工。不過要預咗每日返到去會攰囉，但其實返返下會慣（會覺得攰但真係會習慣個車程）。」

網民：公司規模、福利都好重要

亦有網民建議樓主在決定是否接受offer前，可考慮該公司的規模以及對未來職業規劃的幫助。

• 「份工係普通工定對cv/你career path有幫助先？求其一份就嘥氣啦，自己鍾意嘅想做嘅咪返住先！」
• 「睇埋公司文化。要人好準時返工、要打卡嘅話就唔好做。最好有flexible working hour可以揀幾點返工。」

「老實講2020 FG、14k非專科真係算係咁。上面話九龍東不了但香港有一半工都係嗰一帶，係你自己住大西北遠，不過放工時間係地獄。另外，我覺得仲要睇下份工嘅前途、福利、公司規模。」

樓主居於大西北 網民：遠嘅係你，唔係工作地點

不過有網民卻認為，樓主居於大西北，本身「返邊都遠」，更有人直言「遠嘅係你，唔係工作地點」。

• 「你住大西北就唔好介意份工遠，因為遠嘅係你，唔係工作地點。」
• 「住粉嶺上水大西北就無計啦，返邊都遠。」
• 「咁唔係人哋遠係你屋企遠，大西北去邊都成粒鐘㗎啦！」
• 「有同事日日天水圍返柴灣都係咁返啦！」