奧運選手靠OnlyFans賺取收入 直言該收入為生命線

大家睇奧運班選手企係個頒獎台上面係咪覺得佢哋好光鮮亮麗，但其實佢哋背後嘅辛酸又有幾多人知呢？近日有外媒揭露，唔少選手因為資金不足，都有靠付費社交平台OnlyFans賺取額外收入，當中仲包括奧運金牌得主。

根據運動員權益機構調查發現，超過48個國家嘅500個頂尖運動員入面，有超過一半人冇穩定嘅收入，當中更加有選手因為收入不足而被逼選擇退役，所以OnlyFans就成為咗部分資金不足但又希望堅持嘅選手其中一條出路。外媒報導，喺OnlyFans上傳大膽裸露照片同影片嘅選手，每月可以賺到數千英磅。連里約奧運嘅金牌得主Jack Laugher亦都係其中之一，佢更係以全裸出鏡，仲將OnlyFans嘅收入形容為「生命線」。除咗佢之外跳水選手Matthew Mitcham、Matty Lee、田徑選手Alysha Newman等等，所以有份開設OnlyFans嘅選手可以話多唔多，話少唔少㗎。

組織「Global Athlete 」秘書長Rob Koehler批評奧委會每年有超過17億美金收入，但就拒絕為參加奧運嘅選手頒發獎金，唔少運動員連房租都俾唔起。而OnlyFans就表示十分支持班選手，認為OnlyFans係運動員取得成功嘅其中一個工具，但有頭髮邊個想做瘌痢啊，無論係樂於定逼於無奈去開設OnlyFans都好啦，運動員資金不足都係一個需要被解決嘅問題嚟，希望運動員組織又或者各國政府都可以申出援手，等一班運動員嘅專注力放返喺日常訓練上。

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/