區議會選舉2023｜連登網民投訴收大量宣傳單張　樓主竟同候選人同名同姓｜Ray Online

區議會選舉今個月10號舉行，唔少選民都收到各個候選人寄嘅宣傳單張。有連登網民就「出Post」，影咗天水圍南及屏廈選區幾位候選人寄嚟嘅單張，話久唔久又一封，佔用咗垃圾桶容量，將來「垃雜(圾)徵費」條數點計先？佢問有冇得問議員「Claim錢」，定係要硬食呀？不過「樓主」冇遮住自己真名同埋地址，竟然同當區其中一個候選人同名同姓喎！

當區有4個候選人，樓主唯獨冇影到1號候選人鄧偉健嘅單張，而樓主又係叫鄧偉健喎，唔通係選舉策略，刻意「開Post」打擊其他候選人？候選人鄧偉健回覆傳媒查詢，連番否認係佢「出Post」。佢話選舉廣告要申報，所以已經向選舉事務處備案，就當帖文係廣告。佢又強調冇連登戶口，如果唔係大家「send」畀佢，佢都唔知有呢件事呀。

鄧偉健話研究過選民名單，信中地址嘅選民真係同名同姓。佢強調自己唔係住喺信中嘅公屋地址，透露自己持有物業，唔會有公屋地址。對於「樓主」嘅意見，鄧偉健話自己都有寄信畀選民，同意並唔環保，所以都盡量減少寄信數目，只會一戶寄一封信。

已報名參選區議會選舉的名單：區議會選舉2023｜地方選區及地區委員會界別候選人名單及編號

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)