F組重要賽事，克羅地亞對比利時，賽前比利時嘅情況水深火熱，賽前分數上佢地需要和或者贏就可以出線，但若然同組嘅摩洛哥贏波咁比利時同樣需要贏波先出到線，然而陣中嘅內亂更影響軍心，盛傳迪布尼同華湯根係更衣室入面吵大鑊，所以比利時能否出線真係相當有疑問🤔️
今場比利時排出3-4-2-1陣式，收起夏薩特同巴舒亞伊，由杜沙特拍住35歲老將梅頓斯(Dries Mertens)，一開波雖然有佩利錫嘅射斜，但形勢都係比利時控制大局，而真正有威脅嘅埋門甚少，兩隊速率較慢，比利時嘗試靠反擊製造入球但成效一般，因此上半場兩隊仍然未打開記錄。
下半場比利時為左加強攻力收起梅頓斯換入盧卡古，而傷癒復出嘅盧卡古確實有衝擊力，係53分鐘比利時面對一輪挨打後曾經反撲但盧卡古空門射中柱，其後克羅地亞越打越有，反而比利時嘅盧卡古幾次黃金機會都未能把握，尾段換入夏薩特、泰利文斯同道古亦無力回天，最終克羅地亞0比0賽和比利時，比利時小組賽出局，黃金一代正式落幕。
▼ Follow 足球港場頻道
Instagram: https://www.instagram.com/footballarena_hk/
留言 0