羅馬中場節拍器馬迪遺憾離隊 柏利迪斯、山齊士雙雙來投

根據Fabrizio Romano嘅報導，意甲球隊羅馬終於迎來補強，並向法甲巴黎聖日耳門打包雙中場，先以400萬歐元購入柏利迪斯(Leandro Paredes)，雙方將會簽約2年至2025年，並有一年延長合約嘅選擇。另外連拿度山齊士(Renato Sanchez)以租借形式加盟羅馬，租借費為100萬歐元，另有1500萬買斷條款，當山齊士為球隊上陣六成賽事，買斷條款就會變成強制性🙌🏻

羅馬上季殺入歐霸盃決賽，遺憾地摩連奴未能延續佢嘅神話，整場比賽攻力有限，戴巴拿早早傷出，艾巴咸敗家仔，後備嘅韋拿杜姆同比洛堤無狀態，中場嘅馬迪已經盡力統領中場轉守為攻，最終12碼階段被淘汰，歐霸之旅曲終人散🥴

季後曾經有傳摩連奴、戴巴拿都會離隊，但兩位都因為羅馬嘅球迷而留下，而下一步就係補強實力，不過羅馬受FFP限制，令買人嘅資金相當有限🥲與此同時，上季發揮亮眼嘅馬迪離隊加盟法甲雷恩，據報有傳馬迪因為為婚外情必須離開羅馬城，如此原因離隊或許係最令人感到意外🫣

雖然球隊中堅伊賓尼斯(Roger Ibanez)以3000萬歐元賣到沙特聯賽，但係球隊支出上難以負擔過千萬嘅買人，球隊目前向列斯聯借入中堅路蘭迪(Diego Llorente)同右閘基斯甸臣(Rasmus Kristensen)，免簽中堅尼迪卡(Evan N’Dicka)同攻中艾奧亞(Houssem Aouar)，如今再補強兩位Box-to-Box體力化中場，或許能夠擠進前四位置，但重點係呢位兩位中場都要好好保持健康，否則將會重複上季嘅慘劇😶‍🌫️

▼Follow 足球港場
Instagram: https://www.instagram.com/footballarena_hk/