宅喺屋企，齊做運動
香港最近真係多災多難，大事一件接一件，由成日要出門口到而家疫情嚴重，要留喺屋企以保生命安全，真係仲勁過沙士！留喺屋企，有好多人都話好悶，無嘢好做，仲驚自己無得做運動身體變差。不過，其實好多運動達人都講，做運動只要有適合工具同教學，喺屋企一樣可以好好做運動，保持身體健康。今日就等DailyView用網路大數據話你知，10大家中熱門嘅運動用品，等大家可以喺屋企做平靚正嘅運動啦！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
NO.10 壺鈴（116筆）
俄羅斯最出名係咩？緊係戰鬥民族喇！俄羅斯人咁勁揪，想知佢哋點訓練？咁就一定要從壺鈴開始喇，佢發明地來自俄羅斯，好多人都用佢健身，可以喺進行有氧運動訓練、核心肌群訓練、肌耐力爆發力訓練等等。不過由於佢強度唔低，用佢健身就一定要小心，學識安全方法。初學者可以先從壺鈴硬舉、盪壺同托壺深蹲三個基本動作做起先。
image source:
NO.9 皮拉提斯圈（152筆）
女仔健身最怕咩？緊係做完仲大隻過街邊堆男仔，身體健康反而無咁吸引異性。皮拉提斯圈，就係專門為咗女仔健身而出現嘅恩物！呢個圈，用嚟做肌肉伸展，唔會產生女仔最憎嘅一舊舊肌肉，主要令身材曲線變得更加纖細修長。主要嘅動作包括雙腳嘅腳踝夾住佢、臥身用單腳慢慢壓落去、側身雙腳夾住佢再提起等，對大腿內側肌肉修身好有效。
image source:
NO.8 瑜伽柱（167筆）
瑜伽柱，又叫瑜珈滾筒、按摩柱、瑜珈滾輪，最啱就係忙碌嘅都市人，放工返屋企可以鬆一鬆，強度唔算高，又可以按摩身體。瑜伽柱主要係用返自己嘅體重做定點，按摩深層肌肉、刺激穴位，放鬆肌筋膜、肌肉。呢條柱可以做腳底按摩、小腿按摩、側大腿按摩、大腿群肌按摩等，好適合出去忙完一日嘅朋友，返屋企幫自己按摩，減緩壓力。
image source:
NO.7 電流肌肉訓練器（178筆）
電流肌肉訓練器，聽個名，都知呢樣嘢係高科技！點解咁出名？因為呢樣嘢號稱懶人必用，用佢貼住身體肌肉做運動，會事半功倍咁開心，做十幾分鐘同人地做一兩粒鐘差唔多。不過原理係咩呢？專家話係用電流刺激深層肌肉被動出力，促進做運動效果。但大家要留意，要買就買有牌子嘅先有保障，唔係隨時搞到自己受傷出事，咁就唔醒目喇。
image source:
NO.6 瑜伽球（223筆）
現代都市人健身，除咗傳統嘅健身方法，都有唔少其他選擇。好似做瑜伽咁，唔少男女都用佢做保持健康嘅好方法。而瑜伽球，亦都大受歡迎，因為一個波，啱晒所有人包括復健人士使用，具有按摩作用，又可以配合瑜伽練習瘦身。呢一個波，可以做多種訓練核心肌群嘅動作，又能夠做臀腿訓練，識做嘅連胸肌都可以訓練埋，想知就即刻睇片喇！
image source:
NO.5 呼拉圈（241筆）
呼拉圈，我哋細細個已經識用喇！好多人都話，呼拉圈有助減肥，係好有效嘅健身運動。不過，根據唔少醫師嘅講法，其實呼拉圈對減肥並無顯著效果，但係會令腰部肌肉更加結實。呼拉圈咁方便，一邊用一邊睇電視又得，但做得動作隨時受傷，一定要熱好身先做，同埋每五分鐘反方向做一次。另外，可以選擇加重型呼拉圈，會對瘦腰比較有用。
image source:
NO.4 阻力帶（272筆）
阻力帶，又有個名叫做健身橡筋帶，可以話係現代都市人嘅健身恩物！點解咁講？皆因健身橡筋帶只要用得啱，佢係萬能嘅，可以訓練晒全身所有部位，真係CP值爆燈！用呢條健身橡筋帶，做單腿蹲訓練下腿肌肉，做深蹲、抬腿訓練臀腿肌肉，做繩索面拉訓練後三角肌肉，做飛鳥訓練三角肌中束，做手臂曲伸訓練二頭肌⋯⋯咁萬用又方便，仲唔買返條？
image source:
NO.3 健身滾輪（296筆）
健身滾輪，又叫健腹輪，係近呢幾年新興嘅健身工具，由於體積唔大，好啱買個返屋企自己用。健身滾輪可以訓練腹部、腰臀部同手臂等部位，唔少人都用佢操練出一條完美嘅人魚線，引死人嘅六舊腹肌。不過，如果用錯方法，就完全白費氣力，仲會受傷。專家話，用佢果陣要注意背部唔好直線，用貓駝式，同埋注意伸展範圍，唔好過度令自己失衡。
image source:
NO.2 跳繩（1442筆）
好多只係當跳繩係小學生玩意，但其實好多專家都話，跳繩係最有效率嘅健身、減肥運動，要訓練下半身肌肉，增進心肺功能，或者輕鬆燃燒大量脂肪，跳繩就最啱你喇！跳繩要嘅工具好簡單又抵，就要一條啱用嘅繩。我哋可以用普通雙腳跳，難少少就交替跳，左右跳、三角式跳，甚至愛爾蘭式跳舞，咁多方法，真係好玩又有效，適合每個香港人。
image source:
NO.1 啞鈴（1941筆）
要喺家中健身？最出名嘅，緊係好多人屋企都有嘅啞鈴喇！點解咁多人屋企都有？皆因啞鈴體積細小，相對其他健身工具CP值高，使用嘅空間唔大，一個人自己都可以好好用得到。啞鈴點先用得好，可以增強肌力？要留意返啞鈴要對自己有一定重量，同埋可以選擇臥推，同樣嘅動作會更加有效率。另外，啞鈴伏地臥身都一樣好有用，促進代謝剌激。
image source:
【香港網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年02月01日至2020年01月31日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『10大熱門家中健身工具』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
留言 0