由鄧兆尊及「達哥」林慧韡主持的網台節目《今晚有牌打》近日邀請了林文龍、古明華及法科師傅七仙羽做嘉賓，節目上鄧兆尊更被七師傅更追問有關3個老婆及畀家用等私人事，搞到鄧兆尊被嚇窒。
七師傅自爆跟鄧兆尊媽媽祥嫂甚熟，更指如果有機會都想作法請祥嫂現身，讓她跟鄧兆尊一家團聚，鄧兆尊聽況即回應：「請佢上嚟？你有冇諗過我想唔想同佢一家團聚？不過師傅你咁有誠意，就安排吓啦！」
之後七師傅又坦言知道鄧兆尊有三個老婆，一直想知道他的身家，七師傅當住眾嘉賓問鄧兆尊每個月畀幾多「家用」三個老婆，當堂嚇窒鄧兆尊，不過他亦公開表示：「咁辣㗎！我唔係每月畀，係每年畀，我哋係長期合約嚟！1年50、60萬到咁啦！每一房。」七師傅直指一年畀150萬家用，以鄧兆尊的身家來說不算多，鄧兆尊即澄清自己不是太富有。七師傅再追問老婆收完家用要做甚麼，鄧兆尊就風騷回應：「喺我屋企得㗎喇！煮吓飯，除咗嗌交之外咩都可以做。」