娛圈單打︱女人爭風呷醋　男人最爽歪歪

係人都知，早前捲入炒幣案醜聞、十優港姐麥明詩舊愛林作，其母王莉妮因為同「哎吔前新抱」飲茶敍舊，唔覺意晒出麥明詩B仔正面照，令其私隱破功，引來網民狂轟。嗱，事件又有新發展嘞，「哎吔現新抱」裕美唔抵得「哎吔奶奶」被鬧，開火狂轟麥明詩！林作呢副尊容，竟然有咁多女人為佢爭風呷醋，你話奇唔奇？怪唔怪？

裕美直斥麥明詩係整件事嘅「始作俑者」，話佢生B後，一直發短訊邀約林母跟BB見面，游說林母跟BB上契，林母盛情難卻，先至應邀出席。不料老人家開心得滯，冇為BB照片打格，無辜招來被罵。仲話麥明詩做法令人費解，走去搵前度媽媽上契，「件事本身就有問題」，「有病嘅人先會咁做」，直認不喜歡有人借人上位，見到就嬲。

哈哈哈，都明嘅，眼見男友阿媽，對已嫁作人婦嘅兒子前度咁上心，再睇吓自己被「奶奶」嫌棄，至今入門無期，心有不忿可以理解。呢嗱，早在拍拖初期，林母就明言唔鍾意裕美，又對兒子最終跟麥明詩有緣無分深感遺憾。裕美冬天飲雪水，點滴在心頭，唔眼冤就假。

之但係，隨着林作炒幣落難，突患眼疾，裕美不離不棄，貼身照顧，林母亦對呢位準新抱改觀。兩人唔止有傾有講，仲會影相拍片放上網。

再講吖，以林作把口唔收，兼且其貌不揚，除咗裕美頂得佢順，怕且好難再有第二個咁抵得諗。佢哋真係臭味相投㗎，裕美連跟林作房事不順都攤開嚟講，你話十優港姐點比！林作亦好精，夾在新歡舊愛同老母之間默不作聲，任由一班女人嘈喧巴閉，你話幾爽！

東網網站 : https://on.cc/東網Facebook專頁 : https://www.facebook.com/onccnews/