梁祖堯自認係跳舞擔當 孖湯駿業徐天佑化身美人魚

梁祖堯、湯駿業和徐天佑會在音樂劇扮演美人魚！

由梁祖堯、湯駿業、邵美君和徐天佑主演的音樂劇《三聖邨的Little Mermaid》，混合了來自世界各地的人魚故事元素。阿祖話：「大家都聽過唔同嘅人魚傳說，例如安徒生《人魚公主》講嘅就係人魚公主上咗岸後用聲音換取一對腳返嚟，另外仲有日本都有個傳說，指有個僧侶食咗人魚肉後，有好長嘅壽命，今次個故仔都加入咗唔同地方嘅人魚傳說喺裏面，角色中有匿藏喺人群當中嘅人魚，會有一啲好想捉到人魚嘅人，亦有已經食咗人魚肉變得長生不老嘅人。」

阿祖表示故事會比較黑暗，當中更會探討人性，對應這個急速轉變的大時代，他續說：「呢幾年大家面對疫情，失去好多以前覺得理所當然嘅嘢，依家慢慢復常，好多事情上，大家心態上唔同咗，大家可以喺呢個演出裏面探討一下呢個現象。」

眾演員將會在劇中有舞蹈演出。被問到誰是舞蹈擔當，大家都有不同想法，湯駿業就說：「呢個災難三部曲成日要跳舞，我哋幾個都係跳得嘅人，睇天佑就知啦！」被嘉許的天佑則另有人選：「跳得最好係梁祖堯，我睇佢啲劇成日都跳舞，平日俾人覺得佢唔係好鍾意跳舞，但一有得跳就跳得好落力，仲要好啱beat。」阿祖則自認做跳舞擔當，更透露：「因為我個角色係一個阿伯，一個阿伯點樣跳舞？點跳得好勁？我都未諗得通，所以都好想帶到舞蹈場口自肥一下，但一個阿伯跳舞可以幾好睇呢？到時睇下就知啦！」