英超星期日早場，諾定咸森林主場對阿士東維拉，森林今日又改一改陣式踢4-3-3，左閘起用托夫路(Harry Toffolo)，右閘就用艾拿(Ola Aina)，門將方面就派上由賓菲加購入嘅華卓迪莫斯(Odisseas Vlachodimos)代替上場犯錯嘅Matt Turner。另一邊嘅維拉一貫4-4-2陣式，由迪亞比同屈堅斯作雙箭頭攻堅。
上半場森林早著先機，5分鐘就由艾拿係禁區外割草式遠射破網，領先1比0。火力強勁嘅維拉其實經常搓到入禁區，不斷向前後柱吊高波再入楔，森林只係苦苦支撐住。相反森林一貫踢法縮後防守再反擊，防守時呈4-1-4-1，反擊時由基比斯韋特策動，伊蘭加同艾禾尼爾作衝擊，唯獨客隊維拉以裝越位戰術阻止對方反擊，因此兩隊以1比0帶入更衣室。
換邊後維拉抽走辛尼奧路換入利安拜利加強攻力，但47分鐘維拉門將馬天尼斯犯錯導致失第二球，當時主隊文加拉(Orel Mangala)禁區外遠射，馬天尼斯向上撲走但未有撲出底線，反而落地反彈入網，結果森林兩球在手更加安於現狀，全軍退守塞係禁區。維拉下半場圍攻對手控有8成球權，9次射門其實大部分都機會唔錯，只係一眾維拉球員嘅埋門把握力失準，唔少起腳都射飛機，最終諾定咸森林以2比0擊敗維拉，暫時升上第12位。
▼Follow 足球港場
Instagram: https://www.instagram.com/footballarena_hk/
留言 0