大家細個嗰陣可能都有睇過一啲兒童書係有唔同選擇俾你自己揀，然後發展出不同嘅結局，而家連電視劇都有喇！
網上串流平台Netflix即將推出互動電視劇，用戶可以自己控制情節嘅走向，發展出不同結局！
其實Netflix之前已經喺兒童卡通片實行咗呢個功能，就係《無敵貓劍俠：魔法書中遊》（Puss in Book）同埋《雷霆卡車巴迪：點子袋》，玩遊戲嘅形式俾觀眾選擇要對抗嘅敵人。
依家更加將呢個功能推到部分電影同電視劇，觀眾可以為劇中角色作出選擇，控制劇情走向，每種選擇都會引導至唔同嘅結局。
而最矚目嘅就係預計喺12月播出嘅科幻劇集《黑鏡》（Black Mirror）第五季嘅其中一集將會實施呢個互動功能，等觀眾自己揀情節。
可以自選結局，有人覺得可以令觀眾更加投入，但亦都有人認為會失去觀看性，大家又覺得點？
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0