《2022香港小姐競選》上周完美落幕，冠軍寶座由林俊賢27歲愛女林鈺洧（Denice）奪得。原來Denice從小渴望入娛樂圈，2013年參加香港小姐雖然未能入圍，但之後因表姑姐Naomi (馮鎵瀠)引薦簽約加入模特兒公司出道，做熊黛林師妹，可惜入行兩年多，星途平平，曾經做名店sales，不過Denice仍然沒有放棄娛樂圈夢，如今終得償所願！
出爐冠軍是林俊賢27歲愛女林鈺洧，她奪獎一刻表現驚訝，事後她坦言覺得自己表現未如理想，所以不相信自己能夠奪得冠軍，但被問到有甚麼說話想對父親林俊賢說，就立即招積表示：「我嗰陣時問你（林俊賢）好唔好參選香港小姐呢，你同我講唔好玩，你睇吓而家我攞咗冠軍喇！多謝！」雖然爸爸林俊賢近年長期在內地工作，因不想隔離沒有返港支持，但Denice透露父親林俊賢在她獲獎後已第一時間以短訊恭喜她！
林俊賢前度幫忙「尋女」
林俊賢是80年代TVB小生，由於TVB當時得令的小生如周潤發、劉德華等紛紛轉投電影圈，林俊賢有機會擔正重頭劇《男兒本色》並一炮而紅。不過林俊賢和囡囡Denice曾經有一段很長的時間沒有聯絡，Denice是他和第一任中英混血太太所生，當年林俊賢離開娛樂圈，投資創業遇上金融危機，幾千萬資金化為烏有，林俊賢和混血前妻的婚姻亦只是維持了一年多，妻子帶着只有15個月大的Denice返英國生活。當年林俊賢沒有和前妻爭撫養權，兩父女分開多年，直到Denice 7歲時，兩父女亦只相處了很短時間，便再次失去聯絡。其後，林俊賢結識Winnie再誕下一子，他在Winnie幫忙下利用facebook「搵女」。
知情人士透露:「當時社交平台興起，Winnie知道林俊賢一直都想搵返個女，所以就喺facebook用英文名嚟搵，希望有一綫希望，點知真係搵到一個同名同姓。Winnie喺網上面同Denice傾咗一段時間，核對了Denice中文全名、出生日期及背景，所有事情都相當吻合，大家有共識下就約出嚟見面，嗰陣Denice已經15歲，Winnie做咗好多嘢，令Denice對爸爸釋懷，加上Denice阿媽非常想個女做明星，呢個相認的機會，佢覺得爹哋可以幫佢搭路入娛樂圈，兩父女從此便再度聯絡上，Denice有咩意見亦會問吓爹哋，關係慢慢有所改善！」
做保險收入穩定
林俊賢前女友Winnie除了幫忙尋女，任職保險界多年的她知道Denice想搵錢，便介紹她做保險和幫助她擴大人脈，當年任職保險舊同事爆料:「阿姐（Winnie)當Denice係自己親女兒咁看待，畀Denice住佢屋企，照顧衣食住行，車出車入，日日黐到實，錫到燶！全公司一直以為佢係阿姐嘅親生女，直至幾年後有報道，先知原來唔係親生，公司同事都好驚訝，不過自從Denice入行後，從此再無響阿姐(Winnie)身邊見過Denice啦！」
雖然Denice任職兩年保險收入穩定，不過她志不在保險業，一直渴望入娛樂圈，她曾報名參加《2013年度香港小姐》，但當時欠缺包裝，更被傳媒列入騎呢組別，第一輪已被out。Denice並沒有因此放棄，知道當時做0靚模的表姑姐Naomi在娛樂圈人脈甚廣，終於找到Naomi幫忙，為Denice穿針引綫和極力推薦下簽約經理人Kim旗下，成為熊黛林及Angelababy的師妹，當時Denice夢想成真以「最強星二代」之名入行，又有機會和熊黛林齊齊出席活動。
入不敷支工作大減
原本Denice星途一片光明，可惜當年日日掛住拍拖，工作量大減，因為入不敷支而要靠當時的教練男朋友來接濟， Denice亦迫於無奈放棄明星夢，轉行做名店Sales。知情人士透露:「當時佢想一邊返正職Sales搵錢，一邊接Model Job，不過始終時間好難兼顧。」
Denice除了發明星夢，亦都戀愛大過天，有讀者報料表示，Denice曾經為了捲入複雜的三角關係，曾踩入情敵返工的名店發生不愉快事件。知情者透露:「當時我喺名店做sales，佢同朋友落到鋪頭搵我同事，佢當時應該同佢而家嘅前男友發生了三角關係，佢特登入鋪頭，搞到大家有啲唔開心，我同事事後仲爆喊。Denice牛高馬大，好易認，後來我哋一班同事，隔一排睇新聞先知佢係model，最後個男仔飛咗我同事。」
由表姑姐引薦入行
林俊賢前女友Winnie雖然曾當Denice女兒般看待，不過Denice成功入行後，被傳媒問到是否認識Winnie時，她只淡然表示:「見過一兩次面，唔熟！」之後又曾向雜誌透露當年入行是自己不情願，反指係親戚逼佢，《星島日報》就此事問到當年推薦她入行的表姑姐Naomi。Naomi表示:「係有發生過呢啲事，當時係佢自己要求我帶佢入行，我帶住佢逐間公司去敲門，陪埋佢簽約，但係入行冇耐，佢識咗以前個男朋友之後我哋就冇再聯絡。（你有冇迫過佢入行？）應該冇人逼到一個人做啲自己唔想做嘅嘢，但過去嘅嘢，就由佢，我唔需要人哋感恩，祝佢前程似錦！我哋全家人覺得佢入到五強已經好驚訝，依家仲要攞埋冠軍！」
自爆性經驗博出位
擁有34F身材的林鈺洧，五年來參與過不少幕前演出，在ViuTV星座節目《對號入座》中大爆性史，表示自己有過五位性伴侶，大讚天蠍仔持久力勁，招式多，又表示如果和天蠍座的男仔發生關係，是需要十分大的體力，因為對方會將你翻天覆地，言論非常出位。
為了上位讓更多人認識，Denice亦都在節目《鬼同你上位》以性感打扮探靈，挑戰膽量，Denice在其中一集跟屋主「交流」時，突然驚慌全身動彈不得，又激動地衝出房失控爆喊，事後有師傅指她被靈體跟咗返屋企，為保安全要退出節目，Denice之後在IG爆退選內幕，稱自己是不情願下退出，十分後悔。
全文刊《星島》「名人雜誌」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
