根據Fabrizio Romano嘅報導，曼聯同意甲球會阿特蘭大達成協議，將會以8500萬歐元購入賀隆（7000萬歐元、500萬歐元容易達到嘅浮動條款同1000萬歐元難以達成嘅浮動條款）。雙方將會簽約5年至2028年6月，並且有續約一年嘅選擇。賀隆早早同曼聯達成個人協議，球員相當渴望加盟曼聯，現在終於夢想成真👹
現年20歲嘅賀隆出身於哥本哈根球會，2022年一月加盟奧地利球隊格拉茲風暴(Strum Graz)，上陣21場攻入12球，其後係2022年8月加盟意甲阿特蘭大，聯賽上陣32場攻入9球2助攻，作為年青小將數據上亦算不錯，但真正令其聲名大噪嘅主因係3月份兩場歐國盃外圍賽，當時代表丹麥出任前鋒位置，連續兩場分別對芬蘭同哈薩克上演帽子戲法，及後表現回復平凡，因此曼聯今次購入賀隆可以講係落緊好大嘅賭注💰
曼聯上季自C朗拿度離隊後，前鋒位置一直缺人，雖然冬季借入韋賀斯，勤力回防嘅態度一度得到曼迷嘅歡心，但始終埋門一腳難以撐起球隊。曼聯今個夏天先後引入門將奧拿拿同中場蒙特，而近幾場熱身賽前鋒位置都由辛祖同拉舒福特輪流代替，兩位都並不是純正嘅前鋒，特別係拉舒福特早前表示自己最適合嘅位置係左翼，所以曼聯確實需要購入一位新前鋒🙌🏻
然而年僅20歲嘅賀隆能否捱得到曼聯呢支大球會嘅壓力呢？能力上又是否對得住8500萬歐元咁高嘅轉會費呢？種種因素令呢單轉會嘅滿意程度打上折扣。格連活特能否係今季復出成疑，馬斯亞仍經常受傷患困擾，賀隆加盟曼聯後並無太多時間適應新環境，需要馬上擔當箭頭，年紀輕輕加上歷練有限，希望咁高嘅轉會費唔會摧毁呢位後生仔嘅前途🥴
▼Follow 足球港場
Instagram: https://www.instagram.com/footballarena_hk/
留言 0