【香港估估吓】誰是中國超人？

以往，暑假都係電影旺季，孕育咗唔少年度賣座冠軍，可惜今年嘅市道被疫情打殘，難道真係要靠超人打救？話時話，1975年8月嘅暑期檔，香港確實出現咗一套超人電影，名叫《中國超人》（The Super Inframan），有指當年日本嘅《幪面超人》電視劇叫好叫座，於是出名識得走位嘅港產片製作人即刻有樣學樣，仲搵咗著名科幻小說家編劇添，因而造就咗大中華地區首部超人電影誕生！至於邊個扮演中國超人，你又知唔知道呢？

答案係李修賢，佢响戲中飾演研究員雷馬，為咗對付以冰河魔王為首嘅怪物，於是喺研究所所長劉英德（王俠飾演）嘅協助下，變身成唔怕火燒、唔驚雷劈，兼且身懷閃電拳、追魂腿、死光刀等多樣必殺技於一身嘅中國超人。

東網網站 : https://on.cc/

東網Facebook專頁 : https://www.facebook.com/onccnews/