鄧小巧自爆與未婚夫去年確診！曾失去嗅覺味覺：在家隔離11日後如常生活

鄧小巧於除夕夜宣布接受外籍男友「白先生」的求婚，而正與未婚夫身處加拿大的她，今日（1月7日）更新IG，驚爆與未婚夫一同確診COVID-9。

鄧小巧撰寫長文，透露原來去年4月在加拿大與未婚夫一同確診新冠肺炎，她希望與大家分享第一身經驗，寫道：「2021年4月，我去加拿大探白先生期間，我同白先生都感染Covid-19。今日打呢篇文，只係想同大家分享我真實經驗，等大家對感染Covid 嘅人有第一身理解。但當然我嘅經驗唔可以代表全部人，但都希望幫大家理解多少少。當時有唔少朋友話：唔好俾人知你中過啊。但其實，點解呢？點解要咁恐懼呢？知道多啲唔好咩？」

「首先我先有病徵，喉嚨有少少痕癢，我就去做檢測，一日後醫療單位打俾我，話我確診。然後問我有冇背痛、發燒、咳嗽等各類症狀，然後叫我在家休息隔離10日。冇錯，喺加拿大如果你唔係重症例如有呼吸困難、心臟問題等佢哋都係叫你在家隔離，因為差不多時間白先生都有朋友感染，有啲人比較嚴重但都係在家隔離。早前睇一個報導話印度有個男仔染病後自己喺樹屋度隔離，然後「神奇」好返，講到好似染病就代表一切完結咁。而其實大部份嘅人都會靠自身免疫力慢慢康復，然後產生抗體。」

「講講我嘅康復過程。第一日嘅症狀係肌肉痛同全身無力，頭重重但冇發燒。第二日開始喉嚨痛，有鼻水，但肌肉痛同全身無力頭重重等已經開始變得好輕微。期間白先生投餵大量維他命C 、D 及zinc，同埋普通舒緩感冒徵狀嘅西藥。第三日冇喉嚨痛但有鼻水，開始冇咗少少嗅覺，但頗精神。第四完全失去嗅覺及部分味覺，有鼻水同痰及少少咳，精神唔錯。第五日 一樣。第六日 嗅覺開始返嚟。第七日 人好精神，少少咳少少痰然後味覺同嗅覺都返嚟啦。然後幾日繼續隔離，但身體冇大礙。中間醫療人員有打過幾次電話嚟，問下啲症狀等都係叫我好好休息。然後第11日就可以出外如常生活啦。」

「Covid 嘅傳染性係幾強嘅，而喺我感染期間白先生認識嘅其他人都從不同源頭感染，慶幸我哋大家嘅症狀都算輕，包括白先生72歲嘅爸爸，佢嘅經驗同我哋差唔多，病徵比我哋稍微輕少少。都有一個白先生朋友嘅舅父，有糖尿病感染後死亡，亦有癌症病人朋友，感染後需要較長時間康復。喺香港都有認識一啲感染過Covid 嘅人，都係幾日後就出院。」

「喺加拿大，由於好多人感染，每個人身邊總有幾個人曾經染病，大部份嘅反應都係鬆鬆膊頭，然後：哦。病咗幾多日啊？然後繼續生活、工作。我唔係叫大家掉以輕心，叫大家當Covid係一個joke（某啲社交限制措施先係一個joke，唔洗（使）我補充），但亦都唔好當Covid係世界末日。我只係想同大家講：做足要做嘅措施，其他就交俾個天。足足兩年，總不能喺恐慌同擔憂中度過。我唔知道點樣理解清零政策同隔離政策同疫苗政策，但我相信未來只有更荒謬更可怕嘅事情發生。Netflix 套新電影咪叫Don’t look up 嘅，故事最後，世界盡頭，平平淡淡吃個飯喝杯酒，呢個係我覺得係面對每日惡夢最好嘅心態。」