顛覆嬸嬸的標籤 | 玩轉清邁泰B (泰國 UTMB) | Fitz

一個天未光出發，一個夜晚晚返嚟，兩位港嬸合共跑了150公里，期間的堅持與付出，顛覆了嬸嬸的標籤

我們對嬸嬸的聯想，總局限在廣場、廚房和關愛座。又係嘅，不少50+的女士也自己劃地為牢，視大部份運動為減壽的極限活動，覺得到了四、五把年紀，出身汗？好曬喎，跑上山？咪玩啦，總有千萬個原因逗留在舒適圈內。抱有「努力不一定成功，但唔努力一定舒服」的信念。

但塵世間總有人活在 bell-shaped curve 的兩端，跑班就有幾位不一樣的嬸嬸，跑上跑落，愈跑愈遠，日登鳳頂，夜走針草帽，佢哋唔知嬸嬸兩個字點寫。Eva 和 Corinna 是其中兩位，12月5日她們在泰國清邁機場出現，Corinna 的寄倉行李內藏有5對pole，幫沒有寄倉行李的同學帶過去，用於兩日後 Chiang Mai by UTMB @World Series 的賽事。

約了兩位逆齡嬸嬸在餐廳做訪問，完成大賽有quota食甜品了

因為是 UTMB 的 major series，完賽會獲雙倍石仔數量 (報 UTMB 必須藉參加認可賽事獲 stone，用作抽籤之用，石仔愈多，抽中機會愈大)，吸引眾多香港跑手到此揼石仔，清邁的賽事亦被跑友暱稱為泰B。其實呢個B極之難湊，但這兩位嬸嬸卻擅長湊B，獲得理想成績，Corinna (今個月做奶奶) 50K組別第一，可以直入 UTMB 的 OCC，Eva (今年剛榮升做婆婆) 100K組別第四，也摩拳擦掌去法國，代表港嬸進軍國際，發光發熱。

一切由誤交損友開始

「你哋參加泰B嘅初心係乜嘢?」
「誤交損友囉。」兩人異口同聲訴說。
「有位龍姓跑友，佢跑完清邁，回來極落力向我哋推介，又話好好玩、又話唔難，跟住攞手機啲相出嚟係咁 sell 我哋。」兩位嬸嬸不知除了網上，山上騙子也多。前者騙錢，後者騙你血汗，遺害也不淺。

「你哋冇話要儲石仔咩?」
「我冇㗎。」對於 Corinna，UTMB 仍在濛朧遙不可及的地方，沒出現在shopping list上。但Eva有計劃藉賽事儲石仔，內心 UTMB 的火微微擺動。所以她為此加操：「我報左100K，每個星期要加多一、兩課，做 PT，聞說泰B的路又斜又 technical，所以特別操練斜路。」若只為石仔，只需完賽，不用出咁多汗（呢個係我嚟），但事事認真的Eva不會因此放軟手腳，這是性格位。

「早前毅行，我跟足魔鬼領隊Bee哥的課表，有多冇少。我呢次只係跑50K，唔使特別加料。」Corinna覺得毅行仲有少少老本剩番。

嬸嬸為操練毅行，組隊參加雷利日征，奪隊際冠軍

享受比賽 – 學識唔望錶的 Eva

100K 要打3個大佬，第一個與50K相同，頭4K跑平路，5至12K要上逾千米，跟住持續落斜。「剛開始雖然漫長上斜，都應付到。第二座山的CP遇到朋友，唔想耽誤佢，沒停下來食個杯麵（難得魔鬼領隊不在身邊，原本可以停CP幾分鐘歎個杯麵），匆匆取了幾塊餅乾便與朋友一起離開，沒有吃飽。」寧願捱餓也不想連累朋友，是Eva第二個性格位。

「到了最後一座山，覺得超冇力，又肚餓，特別是下山時，從未遇過那麼陡峭的斜坡，又佈滿發浮沙碎石，發軟蹄好難平衡，十分危險，跣低過好幾次，幸好沒有受傷。幾經波折落到地面，雖然勁攰，就算跑得慢都迫自己跑，因下山時花了不少時間，要而家追番。」這便是鬥心超強、專對付自己的 Eva。

「不過愈心急表現愈差，暗斜落山時險些拗柴，有一下想抽，腳好痛，即噴了撤龍巴斯，再食止痛藥。落坡落極都未完，一路跑一路問左個friend幾次仲有幾遠，最後一段石屎路我覺得長過由波頂落連姐度。」當你好攰，任何一段斜路都會長過落連姐度。同樣道理，當你好唔妥方丈，佢做任何嘢都咁乞人憎。

泰B出名technical同路況變化大，想唔濕鞋要有水上漂功夫

「呢次我全程冇睇過隻錶，唔想俾壓力自己。毅行之後去睇物理治療師，佢叫我試下放鬆享受過程，唔好睇時間，唔好諗名次。佢玩左十幾次毅行，好有經驗，我聽佢話，嘗試學識呢樣嘢，放低個包袱 (唔係背包)。」

「結果呢？」
「好好呀，過程雖然辛苦，但順住自己感覺去，冇壓力，冇受傷，腸胃冇事，又食到野，我係B7 個CP坐低飲左杯熱朱古力奶，食左半個 muffin，享受架。咁反而做到唔錯嘅時間，不用20小時完賽 (19:32，組別第四)，我之前好緊張好出力去玩 HK100 同大嶼都做唔到。呢次我要讚下自己。」緊張和壓力大的人識得欣賞自己，是修練的一大突破。恭喜Eva，可以下山了，吓，又要落斜?

學識唔望錶，但一定要望鏡頭

記得我係愉景灣做 Translantau CP 義工時，遇到鷹鷹到來，他當時與前列外星跑手片緊。我向他說：「有熱粥，好味㗎，不過你應該唔會浪費時間食。」他說：「梗係食，我係享受比賽。」跟住鷹鷹掃埋其 CP 食物，我仲得寸進尺同佢selfie，賓主盡歡。亦記得訪問毅行先生KK sir，他說落場比賽多不戴錶，原來時間是一種負擔。

「我係第一次咁享受比賽，雖然係100K，但呢次竟然會沿途欣賞下風景，遇到啲影相哥哥我會俾笑容，所以呢次睇番好多張相我都有笑，以前望都唔會望。我係處女座，對自己好有要求，平時工作時係萬分緊張，經常失眠，俾自己好大壓力，也令身邊嘅人好辛苦。」這是Eva的發現，也令我想起經常說處女座的堅持嘅阿歹。

極罕見Eva的少女pose，果然放下了時間的包袱

Corinna 耐人尋味的名次

「50K清晨5點起步，戴住頭燈，在密林中摸黑上路，行左好耐都未天光。跑呀跑呀，行到一個轉彎位，突然晨光窄現，大家都呼叫天光啦，有黑暗進入光明的振奮。跟住遇上跑班同學 Denny (遲一個wave出發)，有人陪跑一段，十分開心。」

跑班同學Denny 遇上Corinna，一齊砌緊上CP1，狀態仍然好fit

「其實呢次泰B我冇乜特定時間目標，因為早前在台灣長榮跑馬跌傷了膝頭，跟住毅行冚親個額頭 (到現在還有微腫)，膝頭又二次創傷。所以今次目標只有一個，就是不要再受傷。」

身為 support manager，今次泰B Corinna 給了我一項任務，因我報了20K (其實是24K賽道，唔好太睇小我)，遲50K/100K一日才開賽，我幫手監察住大會的 live track，即時用手機匯報她的組別名次，估計衝線時間接放學和在終點影相。

過第一個CP，Corinna組別第一，即時text她喜訊，但沒有read。我預計她到CP2的時間(只有3.5K距離)，一看live track，遲遲也沒有顯示，沒多久 live track 顯示她是組別第二，半小時後已跌落第四，心諗莫非嬸嬸開得太快爆左?

「我過了第二個CP才有機會攞手機出嚟睇，發現已由第一、第二，落到去第四，冇幾耐收到message，去到第八。反而好開心，因為可以輕輕鬆鬆跑，唔驚受傷。」

其實 Corinna 最差時是去到第14位，估計她不是走錯路就是爆了。沒有再通知她，以免打擊士氣，亦避免嬸嬸跑得太 hea。

「去到尾段，雖然知道不會入到三甲，但望望錶，發覺有機會做到9小時內，雖然好攰，仍提起勁跑，見到好多後生世仔世女都變成步兵，但自己堅持要繼續跑，就算只有跑的姿勢。真係要like下自己。」為目標(不一定要係名次) 鞭策自己付出努力，確要欣賞自己。

「終於衝線，好開心。咦，點解冇同學在終點幫我影相？說好了接放學嘅人去左邊？」

呢個完賽樣，就係叫做跑完好似未跑過樣

Denny用意志對抗想熄機的大腦

回到60分鐘前，我到了終點，看看live track，Corinna 排緊14名，但CP時間都灰色左，沒有顯示。於是check第13名跑手時間，發現還要很久才到，我決定先等 Denny 衝線。突然見一男子一路衝向終點，一路向右邊側去，記得好多馬拉松跑手，當耗盡體力仍苦撐繼續跑，就會出現不停向一邊傾側的動作，因已沒有能力修正。該男子衝過終點後，隨即癱軟倒下路旁，沒有做任何保護自己的動作。

試過問Denny銀行個password，佢唔肯講，就知佢冇乜大礙

原來他就是 Denny，我於是二話不說衝出用作分隔觀眾與跑手的欄杆，見到 Denny 鼻孔附近有血跡，沒有了知覺，大聲叫他名字，拍他的臉 (當然好用力)，他才清醒過來（據聞叫醒一個男人最有效的方法，是向他說：我知道你手機密碼，不過要用女聲）。隨即有救傷人員趕到，合力把他抬上擔架 (好重呀，佢跑完毅行之後又肥番晒) 入救傷站治理。他嚴重缺乏電解，所有能量已接近 zero，手腳不停抽筋，大腦想暫時熄機，否則好危險，但他同大腦拗頸，靠意志撐住堅持唔熄機住，要衝埋線先，真正用生命硬接

Corinna 的大驚喜

我在救傷站料理 Denny 時，忽然接到Corinna電話，心諗唔通佢又途中出事？
「喂，我返左嚟，你哋去左邊？」
「吓，衝左線？點解你咁快返嚟？」

趕去衝線位，見嬸嬸好精神好 fresh 咁站在那裡，隨即與她去 check 成績，見到呢位嬸嬸竟然是組別冠軍，由第14變回第一，這輛過山車實在太刺激。Corinna 好激動，不敢相信是事實，一班美少女工作員恭賀她，嬸嬸忍不住淚水奪框而出，說好夢幻，但仍識得問：「唔知幾時頒獎？」

碟靚人Fit，港嬸 Sa-wa-di-ka

「所有組別冠軍同全場前五名都是明天在台上頒獎，組別第二、三名就現在即時俾獎座。」美少女們好熱心地在解釋。「我聽日著乜嘢衫好呢？唔記得帶唇膏添。」聽到她在自言自語。

上得呢個台，就會朝著UTMB進發

跟著好多同學恭喜她，並告訴她在 Major series 獲得組別冠軍可以不用石仔抽籤，直入 UTMB 的相關賽事。這是個 Corinna 嬸嬸不敢發的夢。「我冇追名次的壓力，輕輕鬆鬆跑，反而跑得幾好。」話雖如此，這些不一樣的嬸嬸總會訂些目標出來追尋，不會令自己鬆懈下來，they make a difference in life。

泰B – 日夜都繽紛的真正盛事

泰B的會場在 PAO Park 湖邊，面積大過維園，好有氣氛，Expo 攤檔繁多，必不能全身而退。終點拱門雄偉有氣勢，附近有不少小食檔口，方便飢腸轆轆的跑手回來飽肚暖胃，每名跑手獲含120積分的 QR code 購買食物。

50K在清晨5點起步，四周還是漆黑一片，但會場燈光輝煌，不同顏色的光柱在空中揮舞，加上湖面的鏡映，是場幻彩詠清邁秀。跑手忙碌地drop bag、熱身、上線，強勁的音樂，激發如箭在絃的氣氛，等待鳴槍的一刻爆發，無須靠名人帶動，才是真正的盛事。

終點拱門光柱輝煌閃爍，氣勢攝人，未起步先給力

右邊是起步點，第一個wave的50K跑手整裝待發，Corinna就係前面第5排第7個，搵唔搵到？

接教練KFC放學，完成100K衝線，影呢張相一定要交輕鬆look，明嘅就明

「CP 食物好好，有能量 waffle、杯麵充足，好多選擇，工作人員積極有禮。路標指示又清晰。」
「有一段經過小鎮，村民和小店店員走出來熱情鼓勵跑手，還幫忙指示方向。」
「果度連啲狗都好善良。」兩位嬸嬸對呢個泰BB讚不停口。

相對香港那場連水都不夠的賽事，港heart泰heart，高下立見。

彩蛋

到清邁必做的事是泰式按摩，間間價錢相若，我哋試過兩間，一間 hea 按，按完好似冇按，真係好難得。另一間堅按，效果超正(因冇收廣告費，所以不會出名)，好啱跑完做 recovery。

除了按，就是食，我哋有一日包車，原本去一間餐廳午膳，但踫著星期一關門，司機嬸嬸載我哋去另一間較為地道、在馬路旁的烤雞小店 (Gai Yaang Kaosuankwang)，客不多，不見港人，冇米子蓮，但烤雞超好味，皮脆鮮甜有肉汁，烤有烤味，雞有雞味，見到廚師好用心把雞撐到好直板，火力可以均勻去到全隻雞。