FI專欄｜中東王子搭雞棚｜渾水

我嘗試從另一個冇人講過嘅角度，去講中東王子搭雞棚嘅核心問題。

現在香港政府為咗跑家族辦公室的KPI，幻想吸納中東資金，但中東都有空心老官。好像這位中東顏福偉，特區政府是當他為吸金的「獵物」。

事實上，只要把這些水貨皇親國戚放在一般級數的老千眼前，都不會把它看成獵物，而是狐假虎威呃其他人……打錯……吸納其他人資金的工具。

「名人橋」係金融入面嘅舊酒新瓶，或者我分享一下前人老千……打錯……金融高手是如何操作。

恆大地產許家印和英國王室安德魯王子有私交。我並不熟悉國際政治，也不熟悉英國皇家關係，但也聽聞過安德魯王子並不是一個聲明很好的皇親貴族，尤其是他沾上了華爾淫媒愛潑斯坦那些11哥性醜聞，好像是吧，我沒有追得很貼。

不過不要緊，即使一張紙巾，一條底褲都有佢本身嘅用處。空心老官只要加以善用，都可以係一個出色嘅演員、工具人。

透過這些很表面的私人關係，許家印和安德魯王子搞過很多私下活動。那些出席活動的客人見到許老闆居然和英國皇親國戚那麼相熟，看到他們如膠似漆，當然就覺得許老闆有過人本領，乖乖把自己的金錢奉上，去投資那些不知幾多個億，但又一文不值的恆大債券和奇怪項目了。

許老闆心裏清楚明白，安德魯王子空有一個貴族銜頭，石頭鑽不出血，與其你當他是一個獵物，倒不如你和他一起合作，去Target另外一些獵物。

即使本地香港也曾有一個經典金融高手，宣稱過自己在非洲南方小國發掘了一個石油項目。他甚至把那個小國的總統請了過來做RoadShow。

當然，背後就是一個大型供股項目，加上大型炒作，搵晒所有基金和散戶全方位落疊。事情一如所料，這個項目每年虧本數十億，一滴石油也搾不出來，那個非洲窮國總統當然不會有什麼錢，但他們很知道誰是埋單水魚。

現在設身處地站在那個中東顏福偉嘅角度去思考問題，比着你都會走。他是空心老官這點，是連KOL都可以喺網上搵到嘅公開資訊，結果整個政府還希望從他身上攞到錢。

中東顏福偉的角度是，希望利用自己的虛假光環，去和香港政府合作吸他人的錢，吃大茶飯。結果現在香港把他當了作水魚本身，你係佢，當然走夾唔唞啦。

明明人哋係演員嘅材料，偏偏你就當左人哋係監製，試問又點會唔出事。

香港金融大倒退莫過於此，並不在於IPO減少，外資流失，而是在於連呃人的老千都退步了。現在的金融老千莫講話呃人，連誰是水魚都不知道。你若不俾人呃返轉頭，已屬萬幸。
最慘係5億美金真係唔算多錢，喺家族辦公室世界是九牛一毛，結果揭了整個香港的底牌，原來係咁粗疏。

喺Buyside嘅世界，所謂嘅家族辦公室，係有好多方法吹噓自己「管理」大量資產，而嗰啲錢，係唔需要到位。反正都係KPI主導，大家可以走一個形式主義，錢不用到位，大家互相面上貼金，結果變成一台爛戲，互相尷尬。

Subscribe FORTUNE INSIGHT Telegram:
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen