嚴祟天勁Like李司棋　最想跟對方學煮餸

藝人嚴祟天、瑪姬嘅直播平台近日就邀請到，開台至今最重量級嘅嘉賓李司棋，一齊傾食保健品嘅心得。其中瑪姬自爆好耐之前曾經同司棋姐喺電台合作做過節目，笑話︰「當年個節目好早播出，所以我通常嚟到都好游魂﹗」而嚴崇天話之前喺工作上有同司棋姐見過一面，估唔到對方一到埗就認得佢，覺得好驚喜︰「做直播之前其實都有啲緊張，因為司棋姐咁有地位，好怕自己招待不周，但佢真係好Nice，一見到我就話好熟面口、肯定有見過我，隔咗咁耐仲記得我好開心，佢係我最鍾意嘅女演員，『荷媽』、『大契』呢啲角色我全部都好記得，直播嗰陣我仲用佢劇入面嘅金句『呢度唔係法庭，我對眼就係證據』嚟笑瑪姬﹗」

嚴崇天又話私下有Follow司棋姐個社交平台，知道對方經常大顯身手煮嘢食，隔住個Mon都流晒口水︰「最近有幫香港開電視拍飲食節目《夠鐘食晏》，而嚟緊就會同梁嘉琪再開拍另一個新嘅飲食節目，希望下次有機會再邀請到司棋姐做嘉賓，順便我又可以偷吓師。」

東網網站 : https://on.cc/

東網Facebook專頁 : https://www.facebook.com/onccnews/