【世上只有媽媽好】娛樂圈10大孝順藝人
古語有云：「百行以孝為先。」不少人都覺得娛樂圈係一個大染缸，多是非，品流複雜，工作唔定時，做依行就等於「斷六親」，但其實圈中都有唔少出名孝順仔女，其中一位仲拎過演藝界十大孝子大獎，一齊睇吓係邊個啦！
原文：SundayKiss｜圖片：新傳媒圖片
孝順子女逐個捉
1 袁偉豪 花生耳環氹媽媽
袁偉豪同屋企人感情要好，2016年佢憑《城寨英雄》段迎風喺台慶攞「最受歡迎電視男角色」，喺台上曾喊住多謝媽媽。袁偉豪說由於爸爸患癌，媽媽一直照顧爸爸好辛苦，付出咗好多，所以佢依家事業開始上軌道，希望自己可以成為屋企嘅經濟支柱，有咩都會義不容辭咁幫手。而佢35歲生日時，於微博發佈了幾張同媽媽合拍嘅童年照，感謝媽媽將佢帶到世上。袁偉豪樣子跟媽媽有八成相似，相片中，佢將花生當耳環，並留言：「我愛的媽媽把花生當耳環」。原來係為咗氹媽媽開心而戴上去，搞笑又孝順。
2 惠英紅親演腦退化母
惠英紅在其主演嘅2016年電影《幸運是我》中，所飾演嘅腦退化病人角色，原來正正係佢嘅母親。小紅姐工作雖繁重，但仍堅持與母同住。其母於五十多歲時患上腦退化症，可惜當時惠英紅懵然不知。直至七十多歲，一次跌傷後，惠英紅才發現母親病情嚴重，令佢非常內疚。所以她佢定出演此電影，希望以過來人身份令大家能夠關注腦退化症，給予患者多點關懷。
3 容祖兒 推job伺母
容祖兒與母親感情相當要好，係無人不知嘅事。祖兒父母喺佢15歲時離異，自始祖兒與母親及弟弟相依為命，向來非常照顧家人嘅佢至今一直與母親同住。向來是工作狂嘅，2014年中，因為容媽媽患重病，祖兒決定放慢工作腳步，推掉唔少工作，務求每天陪伴母親，令佢損失三千萬，但佢表示絕不心疼，家人大於一切。佢亦曾說母親獨力撫養佢，所以容媽媽係佢人生中最重要嘅人。
4 王祖藍 買樓贈阿媽
王祖藍近年北上發展，進帳不少，除咗花逾1.1億元購入大埔逸瓏灣II特色單位，又曾斥約3,700萬購入同屋苑另一個連花園低層特色單位予母親，希望可以住得近一啲，左鄰右里，能夠互相照應，又指努力工作都是為家人。
5 余詩曼 為母賀壽
5歲喪父嘅佘詩曼由母親獨力湊大三兄妹，出名孝順嘅佢雖然係大忙人，忙完拍劇又忙宣傳，不過絕對唔會忘記佘媽媽生日，年年都抽空親自揀選蛋糕同鮮花送給母親，2016年尾佘媽媽67歲生日，佢仲喺社交網站話如果自己要喺地球出世一千次，佢希望每一次都係佘媽媽做佢媽媽，大曬母女情！
6 馬國明 與父母同住
講孝順一定唔少得馬國明，馬明對上有兩個孖生家姐、身為家中獨子嘅馬國明，一向對父母非常孝順，更堅持唔搬出去，婚前婚後都要同屋企人住！前年馬國明花1,960萬做業主，換上大屋，都係想爸爸媽媽住得舒服，呢啲廿四孝乖仔去邊度搵呀？
7 陳小春 照顧病母
陳小春曾被評選為「中國演藝界十大孝子」，佢母親多年前患肝癌，陳小春走遍各大城市，不論中醫定係西醫、大醫院定係小診所，希望打聽到醫治母親嘅方法。母親患病期間，陳小春一直陪伴在身旁悉心照料﹐最後陳母於2005年病逝，母親嘅去世令陳小春大受打擊，更令佢幾乎暫停所有演藝工作。
8 林保怡 拖父母行街
林保怡父母都已離世，曾有雜誌以孝順為題邀約林保怡做訪問，但卻被林保怡拒絕。林保怡認為為人子女理應孝順父母，毋須刻意著墨。又指媽媽生前，佢會拖住媽媽嘅手行街。過身後，佢拖住爸爸手，但佢爸爸最初不習慣，後來習慣咗，還會面上流露一份以佢為榮同驕傲嘅喜悅。林保怡對家人嘅愛，由佢口中表露無遺。
9 黃又南 為父還債
黃又南曾因為父還債，有六年每個月只得二千零蚊使，佢指父親患腦退化後，已經唔記得又南幫佢還過錢，但仍然認得出又南：「咁已經足夠嘞，經歷過咁多嘢之後，我發覺一家人坐埋一齊，好簡單，已經係好開心嘅事。我爸爸雖然腦退化，但行得、走得，身體健康，佢只係因為認知障礙，變到好似細路仔咁，我覺得其實佢開心咪得囉！」
10 陳法蓉 父女檔出遊
近年大部分時間北上拍戲嘅陳法蓉(Monica)，非常重視家庭生活，不忘抽空陪伴83歲老父，除咗每年陪父親慶祝生日，有時間仲會兩父女一齊去旅行，認真孝順！
11·黎姿
娛樂圈美魔女無數，而黎姿(GiGi、現名馬黎珈而)絕對榜上有名，今年47歲的黎姿美貌依然！不過GiGi唔止靚，仲好孝順同顧家，原來佢趁上周末復活節連假，帶同三個囡囡及父母三代同堂去旅行聚天倫，真係好溫馨！
09年黎姿宣佈與富商馬廷強結婚，並於翌年誕下一對孖女馬家蔚及馬家鎂，之後再喺2012年誕下女兒Pegella。
已是三女之母的黎姿，除了要忙住湊女及照顧家庭，又要打理上市的美容生意，加上又要照顧父母及弟弟，但現年47歲的Gigi保養得宜，化上淡妝都依然咁靚！
12·吳廷燁
《鐵探》中飾演嘅幕後大佬營長嘅吳廷燁，演殺氣大佬非常矚目！然而，現實中嘅佢其實係個超級孝順仔！58歲吳廷燁甘為照顧93歲年邁母親， 放棄拍拖約女，由住開的半山豪宅搬返黃大仙狹窄公屋，還拒請工人，堅持一 日三餐以至家務日常都一腳踢，事事親力親為唔怕困身，就連同老死梁朝偉約會都冇時間，全力侍母！
吳廷燁有感請工人唔及自己細心，寧願煮飯家務 一腳踢，買餸亦專揀啱老人家胃口及易咀嚼如豆 腐的食物，堪稱廿四孝好仔！
寧願唔請工人，照顧阿媽親力親為的吳廷燁，另一日就一個 人去街市買餸及添置日用品，孭住大個背囊又揪住一大袋嘢 返上樓。