Ian自爆入行心靈受挫　幸得張敬軒助開竅：佢開導咗我

MIRROR成員陳卓賢（Ian）與張敬軒關係密切，張敬軒曾公開感謝Ian在他患上COVID期間悉心照料，Ian近日亦表示，自己能「開竅」全靠張敬軒。Ian日前接受一個關於情緒健康的電台節目訪問，提到自己在初入行時，經常因太執著而影響心理健康，甚至會「匿埋自己喊」，幸得張敬軒助他打開心扉。

Ian在節目中形容早期的他比較封閉，因為經常被人誤會，所以寧願不跟人溝通：「有段時間嘅我較封閉自己，因為成日畀人誤會，可能我想表達A意思，但大家會接收咗B意思，又或者見到我唔笑，就覺得我好Cool，同人溝通有好多誤會產生，咁不如唔好溝通，久而久之變得封閉，反而近年嘅我願意同人分享多咗，可能因為個人成長咗啦。」

Ian又指，他在初入行時對很多事情都很執着，影響自己的情緒：「2020年至2022年中，我心理健康一般，嗰刻唔意識到嘅，但𠵱家睇番轉頭，就覺得有問題，嗰時成日唔開心，匿埋自己喊，可能係公司合約上嘅事，或者媒體報道嘅嘢，例如明明我冇做到，點解講到我有做，我會好唔開心。」

雖然哭出來令Ian 感到即時抒壓，但他表示自己最終能開竅，全靠張敬軒幫助：「我同佢（張敬軒）熟咗之後，發覺有好多相似點，佢亦會話我早段日子，同佢以前後生好相似，佢想我好啲，所以分享佢嘅經驗，開導咗我好多，同佢之間有種信任，知佢講嘅嘢係為我好，於是我試下做個改變，發覺自己舒服咗，冇再咁牛角尖。」

Ian亦在訪問中提到與家人關係，指自己在4兄弟姊妹中最細，因為年紀相差太大，小時候沒太多與哥哥家姐溝通，反而在工作後，才與家人關係變得更親密。他在傳統家庭中成長，父母管教嚴格，而自言百厭的 Ian，亦曾被「打到爆」：「以前大家都係體罰，𠵱家小朋友坐唔定，大家會知道可能有其他問題，例如ADHD（專注力不足），𠵱家有呢啲認知，但以前一概係曳，以前嘅我都係坐唔定，父母覺得唔乖就打。我最曳係做過啲乜？小學試過濕啲紙巾掉上天花板黏住，跟住天花板就會有個印，真係好百厭、好貪玩，咩都想試。」雖然小時父母對Ian體罰，但Ian心知道父母很愛他：「佢哋已經將佢哋當時最好嘅嘢畀晒我。」

他又透露自出生已領洗，中小學亦在天主教學校讀書，他習慣祈禱，就算入行後亦保持祈禱習慣，他說：「開騷前會祈禱，祈禱可以令自己心神定啲，有清醒頭腦去處理問題，當工作遇到控制唔到嘅事情，我會祈禱。」至於何謂幸福，Ian認為，自己想關心和照顧的人得到照顧，不用擔心太多，就是一種幸福。