孤注一擲｜洪助昇演「毒男」 教王大陸講廣東話粗口

由王大陸、張藝興、鄧萃雯主演，於內地票房大收38億人民幣的《孤注一擲》，於香港正式上映，故事圍繞虛擬貨幣、海外詐騙、電話詐騙等網絡騙案為主題，英皇歌手洪助昇（Aiden）亦有份參演。

電影中Aiden飾演一名「毒男」，他說：「試造型時，造型師想我剷光頭，一開始都好緊張，因為未試過，但後尾覺得放平陰，再戴上金絲眼鏡比較『毒』，就變咗𠵱家戲入面造型。」

戲中Aiden與王大陸有不少對手戲，其中一場王大陸需要講廣東話粗口，但他不懂，所以Aiden便成為他的「粗口老師」，最後整個片場都粗口橫飛，他說：「佢知道我係香港人，於是問我『四字真言』嘅正確發音，我就將我畢生識得嘅粗口都教晒佢。例如問候人哋媽媽、喺條街跌親、全家都好富貴等。之後其他演員又一齊學，將大家聽過喺港產片嘅粗口用晒出嚟，最後成個片場都係粗口。」

問到相處趣事，Aiden表示等埋位時經常吹水，有一次王大陸於片場為他公開招親，十分搞笑，他說：「佢問我有冇拍拖，我搖咗一下頭，點知佢突然就喺片場幫我公開招親，好大聲咁話我仲未拍拖，又去問女演員對我有冇興趣，對方微笑拒絕，我就直接食檸檬，好尷尬。」

（即時娛樂）