網友嗌綜藝疲勞　真人騷收視甩轆唔關張衞健事！

藝人張衞健（Dicky）曾經被譽為收視福將，當初公布佢參加內地內地綜藝節目《追光吧2》，好多粉絲都好期待，話一定捧兒時嘅「如來佛祖玉皇大帝觀音菩薩指定取西經特派使者花果山水簾洞美猴王齊天大聖孫悟空 」嘅場，點知個節目嘅收視卻不似如期，話比同時段嘅其他綜藝節目如《非誠勿擾》、《青春環游記》嘅收視差啲。

點解呢？有網民就話唔關 「齊天大聖Dicky」失神力事，經分析過後，有人覺得只係同類節目實在太氾濫，上年播完《追光吧！哥哥》，又播《乘風破浪姐姐》系列，之後再有《披荊斬棘的哥哥》，仲衍生多個《大灣仔之夜》出嚟，所謂食得魚翅多都想食煩啦。

啲星就算幾有才華，幾好笑，睇得太多同類節目都會「綜藝疲勞」，加上節目嘅核心人物、著名主持金星疑似退出錄製，冇得聽佢寸爆人，連嗰個「追光藝術委員會成員」宋雨琦，一係唔出現，一出現就企喺班「哥哥」中間，搞到啲觀眾一頭霧水，唔知係睇緊選男圑定揀女圑，既然問題多多，真係神仙都難變出好收視，何況Dicky唔係聖人，只係一個藝人嚟，千祈唔係怪錯Dicky呀。

東網網站 : https://on.cc/東網Facebook專頁 : https://www.facebook.com/onccnews/