58歲林海峰昨晚亞博開騷　今晨玩兩項鐵人奪第三名

林海峰(Jan)一向熱愛運動，尤其跑馬拉松，上年10月以3:40:36完成芝加哥馬拉松，成功集齊六大馬拉松大滿貫獎牌。而今年1月踏入58歲的他再次挑戰自己，今晨(6日)出戰於淺水灣舉行的2025年水陸兩項鐵人賽，更加勇奪年齡55歲至59歲組別第3名。

而且早一晚林海峰還要以軟硬身份出Show，昨日朝早他在社交平台分享游泳後相片時留言：「換件衫今晚去亞博同老麥慶祝五十歲！」而今日再在IG報喜：「如果今日咁蹺喺街撞到呢條友完全唔鞋口鞋面仲笑口吟吟鬼死咁好禮貌周圍同人鞠躬打招呼個個嗌早晨你哋明㗎啦？ #AquathlonChallengeDistance #Male55至59 #第三名 #深淺南」另外軟硬亦有分享：「極限三項鐵人：出show+游水+跑步，重贏埋第3名🥉800m 游水 + 21分跑5km！林公子真心respect👊👊 #完全明白點解M記尋晚得10分鐘軟硬 #完全唔介意2130完show #可能唔表演會贏第1 🤣」
翻查官網，林海峰參加2025年水陸兩項鐵人賽的「Challenge挑戰組」，即要先游水800米，再跑5km，而他的完成時間為40分42秒。