Dear Jane邀鄧麗欣任新歌MV女主角 Tim讚Stephy凍齡冇變過

Dear Jane推出新歌《到底發生過什麼事》，請來鄧麗欣（Stephy）擔任MV女主角，「試當真」的校花「泰妹」與校草「Stone」、YouTube Channel的JFFT 床哥&翼Sir亦有參與演出。

主音黃天翱（Tim）18年前曾為Stephy與傅穎的歌曲《 親朋勿友》 MV擔演男主角，兩人18年後再合作，卻未有同場演出。Tim說︰「幾得意，緣分就係咁，大家冇見咁多年，原來又可以見番。拍MV當日，我有去探班，講聲Hello、傾吓偈。佢同18年前一樣樣，仲好似瘦咗。大家識咗好耐，又好耐冇見，18年來各自行自己嘅路，今日各有成績又撞番幾好呀，佢最近喺演戲上面搵到自己的方向，演技又出色。」

Howie希望能翻唱Stephy的歌曲︰「我經常聽嘅廣東歌名單，90後歌單一定有Stephy歌曲喺入面。《不要離我太遠》，我都識唱，想翻唱吓，幾好玩。」泰妹在MV中飾演Stephy的年輕版，Stephy讚她演得非常自然。

（即時娛樂）