情人節有情人陪當然甜蜜啦，單身嘅你都唔需要太灰心，近年唔少年輕人都開始流行拜月老求姻緣，記者都聽過唔少身邊朋友會去台灣求姻緣，當中呢間霞海城隍廟更加係9成人推薦！
霞海城隍廟位於台北大稻埕區域，呢度係一個比較懷舊嘅地區，而城隍廟就喺1856年建成。根據記載，1971年有位老太太，非常感謝城隍爺保佑佢丈夫事業好同孩子學業順利，美中不足係啲仔女揾唔到另一半，於是佢再向城隍爺祈求，點知唔使好耐，幾個仔女好快就搵到對象。老太太最後捐獻月下老人神像一座，以表謝意，自此就令城隍廟香火更鼎盛。
據知霞海城隍廟能夠成為台灣三大靈驗月老廟之一，係因為每年都有約6,000對愛侶嚟還神，唔計未還神嘅人，加加埋埋每年隨時湊合到6,000對有緣人，聽講舒淇2006年同馮德倫閃婚之前嘅3個月都曾經嚟呢度求紅線，聽完係咪都心郁郁想去呢？去之前梗係要學定拜月老方法先啦！
好多人會諗住拜月老要自己準備糖等等其他物品，其實你帶個人去都得㗎喇，因為依家拜月老越來越流行，基本上廟祝都會準備晒所有嘢畀你。
首先要去廟嘅金紙舖準備金紙同香（左邊門口入），之後就要去右邊嘅廟內辦事處櫃檯攞貢品（鉛錢、紅絲線、喜糖），貢品係第一次拜月老先需要，如果你之後再拜或者你唔見咗條紅線都係唔需要再準備，而金紙就寄放櫃檯。
跟住去返點香處點香，記得三支香都要完全點著！行到門口，面向天公爐前拜天公，簡單心入面講自己個名、年齡同地址（完整地址，如果唔係會搵你唔到），請天公保佑事事平安，三拜之後就可以入場去櫃檯拎返份貢品，三支香要小心拎住。
先向正殿嘅城隍爺、月下老人同一眾神明自我介紹，然後就要講清楚自己想要嘅理想對象條件，越詳細越明確越好，亦都無規定最多幾多項，有時你會見到善信都拜幾耐㗎。講完記得同月老講聲叫佢幫幫手早日幫你牽紅線，日後結婚一定會帶喜餅還神！
接下來你可以順住方向行，分別參拜義勇公﹑城隍夫人同菩薩，有助趕走小人、平安順利、家庭幸福同埋開啟智慧等等。
拜完之後就出返去天公爐插香，之後將鉛錢、紅絲線喺香爐內順時針轉三圈，以後就放銀包內，食埋喜餅、喜糖同甜甜嘅平安茶就禮成㗎喇。
一開始買嘅金紙喺收集箱度，廟方會一次過幫善信燒，係咪好簡單呢！
不過咁，去拜月老有少少禁忌要注意：
－唔可以戴太陽眼鏡、帽或口罩入場（月老會睇唔清楚你）
－所點燃嘅香同之後嘅平安茶太熱都唔可以用口吹，可以用手撥熄火種
－唔可以帶傘入內，因為傘同散發音類近
記者身邊都有唔少朋友去過城隍廟求姻緣之後一年內就開花結果，寧可信其有，有時間去台灣旅行不妨抽時間去行一圈！
台北霞海城隍廟
地址：台北市大同區迪化街一段61號
前往方法：從台北車站坐的士前往，約7分鐘車程；或從台北捷運北門站三號出口向前行約10分鐘
開放時間：上午6:16至下午7:47
（原來呢個時間係同飛機有關，616取自輕型單人機D616，而747就係指波音747，有祝福大家滿載而歸、平安回家嘅意思，真係好有心思呀！）
撰文：沙拉
