獨家丨簡民迪見盡娛圈人情冷暖 由唱片高層轉戰開車仔麵店

前華星唱片高層簡民迪（文迪），曾是EO2、狄易達、賈曉晨、陳文媛及裕美等的經理人，近年轉戰飲食界，於觀塘開設車仔麵店，投資幾十萬屬小本經營。於娛樂圈打滾20多年，民迪意興闌珊：「呢行好現實，藝人覺得你幫唔到佢會怨你，至少蘿蔔、雞蛋、魚蛋唔會鬧你！」採訪：方騫平 攝影：沈健程 場地：火雞姐嗱喳麵@成業街16號怡生工業中心

簡民迪堅持要有70年代嗱喳麵味道，所以搵嚟老師傅做大廚確保質素，店內主打大隻佬牛肉羮、小強及火雞姐嗱喳麵，要求好食兼抵食。至於店名以電影《食神》中「火雞姐」角色為命，除咗覺得幾代表到香港，原來同莫文蔚(Karen)有段小故事。

藝人好現實問候都冇句

民迪記得在滾石唱片任職時有次瞓過籠，搞到接唔到莫文蔚，要Karen自己坐的士返公司整頭：「我一入門口就鞠躬向佢致歉，佢不但冇怪責我，仲奉上三文治話『食早餐啦！』嗰刻真係好感動，?家就算啲伙記做錯嘢都唔使鬧人，咁樣佢哋仲會深刻記住，至今我同Karen仲係好好朋友。」文迪在華星時跟過梅姐(梅艷芳)做唱片宣傳，「梅姐提醒我要做潮流先驅，做生意都一樣。」至於疫情期間甚少公開露面嘅陳奕迅都有落鋪撐他，民迪最記得當年大家經常踼拖去摩利臣山泳池操水，之後一齊食早餐。

回顧娛樂圈嘅日子，民迪話見盡人情冷暖受盡白眼：「每個藝人都有脾氣，身邊人會受晒，不過我唔會同佢哋爭拗，唔過份嘅話轉身走就算。最唔開心反而係幫到藝人就十萬個感激；否則就怨你，當你離開一句問候都冇。」

星島新聞集團慶回歸25周年專題網站，請即瀏覽

立即下載 | 全新《星島頭條》APP : https://bit.ly/3yLrgYZ