雲浩影坐專屬電車為個唱造勢 鄧麗欣驚喜現身授淡定心法

雲浩影（Cloud）將於8月2日假旺角麥花臣舉行首個個人演唱會《Finding Cloud 雲浩影演唱會2025》，門票明早（3日）公開發售。Cloud日前乘坐印了其演唱會海報的「雲影號」電車遊走港島宣傳，出發前獲「迷雲黨」（歌迷暱稱）送上生日蛋糕，預祝她本周六的生日及個唱門票大賣，鄧麗欣（Stephy）更驚喜現身傳授「淡定心法」，令Cloud十分感動。

對於預訂門票火速售罄，Cloud坦言鬆口氣：「話晒係我人生第一個演唱會，好想大家一齊見證呢個特別時刻。預售門票好快賣晒，我好開心亦鬆咗一口氣，因為曾擔心售票反應，所以好多謝大家支持。」終於見到「雲影號」真身，Cloud非常開心。數10位「迷雲黨」專誠到場支持，還大合唱生日歌和送上黑膠唱機造型的生日蛋糕，Cloud表示好感動。活動主持謝茜嘉問他們是否暗示期望Cloud推出黑膠碟？他們答「係呀」。Cloud笑言：「我本身無黑膠唱機，呢個係我今年第一個生日蛋糕，同埋第一個唱盤。」

「雲影號」從屈地街電車廠出發，向銅鑼灣方向行駛，途中Cloud在電車上層接受謝茜嘉903電台節目「叱咤樂壇」錄音訪問。神秘嘉賓Stephy在上環登車，靜靜地走到Cloud身後，Cloud驚喜得成個人彈起，掩嘴傻笑。早前在紅館舉行個唱的Stephy即將巡唱到澳門，Cloud立即問她如何面對緊張情緒？Stephy說：「其實每個人都會緊張，即使好有經驗嘅前輩，都話我知佢哋都會演出前緊張，正常㗎！」之後她們在銅鑼灣落車，並在電車前合照留念。

送走Stephy後，Cloud對「迷雲黨」說：「我終於明白你哋點解成日見到我都咁靜、唔講嘢，原來係會好開心和緊張，唔知講乜好㗎！真係好驚喜，我畀佢（鄧麗欣）嘅靚嚇親，好開心有位大前輩嚟為我打氣。佢做過不同嘅演出，亦明白我第一次做演唱會嘅心情，對於我嚟講有幾重要同埋緊張，佢同我分享咗好多經驗，我好開心有一個同Stephy一對一對話時間。原來佢都會緊張，知道之後我反而淡定咗少少。因為我印象中嘅Stephy係非常淡定、唔會緊張，知道原來佢都會緊張嘅時候，我就發現自己都係好正常。佢講得好啱，最緊要點樣將緊張同埋壓力，變成動力令自己做得更好。我覺得我哋公司嘅女藝人都好犀利，例如Sammi（鄭秀文）、Stephy都好值得我去學習，感受到佢哋對自己嘅工作嘅喜愛同埋付出，我要繼續努力！」

（即時娛樂）