【蘇跑旅遊】來自天堂的明信片　奧地利哈爾施塔特

奧地利的哈爾施塔特（Hallstatt）被譽為「來自天堂的明信片」。德語Hallstatt有「鹽」嘅意思。當地居民除咗盡收美景，更因附近的鹽礦致富。呢個奧地利小鎮更於1997年被納入世界文化遺產，吸引無數遊客到訪集郵。

前往Hallstatt的方法：

• 蕯爾斯堡Salzburg是距離Hallstatt最近的地方，車費最便宜，旅客可以選擇以火車或者巴士到達。詳細班次可於官網www.oebb.at/en，或下載ÖBB App查詢。

• 從維也納Vienna岀發到Hallstatt，先乘坐火車，再轉乘船到小鎮。注意此程購票列車有earlybird優惠，建議預早上奧地利國鐵官網購買。

• Český Krumlov小鎮有shuttle bus到達Hallstatt station，車程為3小時。較多人選擇CK Shuttle或Bean Shuttle。

其實前往哈爾施塔特要預準班次有啲麻煩，聽講撞正旺季的話，淨係排隊上船都要花成個鐘。唔想太複雜嘅話，可以好似我哋咁，住蕯爾斯堡嘅旅館，再一早自駕去Hallstatt，車程唔使一個鐘，又夠彈性，最緊要係早啲嚟到就可以睇到順光嘅哈爾施塔特！

要喺呢個「經典名信片角度」打卡才稱得上到Hallstatt一遊。從碼頭起步，沿湖邊行大概15分鐘便可以到打卡位。Google Map可以搜尋「Classic Village Viewpoint（明信片角度觀景台）」，在那裡可以影到Hallstatt最美麗嘅角度。大批跟團旅客會喺中午時分岀現，唔想同人爭靚位影相就要早少少岀發。

由於Hallstatt沿湖邊一帶嘅小屋係面向東面，想影靚相嘅朋友，建議最好喺早上9點至11點到達觀景台，咁就可以影到順光嘅Hallstatt，顏色更豐富。遊過廣闊平靜嘅湖邊，好有一種洗滌心靈嘅感覺。

位於Hallstatt中央的Marktplein市集廣場，又名馬克廣場，主要是手信店和食肆集中地。遊客如想買手信，就要到這逛一逛，從衣物、精品，甚至來自鹽洞的鹽也有，總有一款合你心意。想寄印有Hallstatt郵戳嘅名信片都好方便，寫好然後到近碼頭嘅旅客中心寄岀就可以。

想買手信留個紀念，當然要買呢度嘅特產礦鹽，咁先代表自己去過Hallstatt，第二度好難搵返同類型嘅手信。

行到咁上下，當然想返間餐廳食下嘢relax下，對住零死角嘅靚景嘆杯咖啡，感覺好正。沿途仲有好多特色餐廳，要注意多數餐廳會係中午時間先營業，建議各位先逛逛再去用膳。

想一邊用餐一邊欣賞湖光山色，Restaurant am See設有戶外湖景座，是個不錯的選擇。如果想同時盡享味覺和視覺享受的遊客，不妨到訪試下。

Restaurant am See 
地址：Wolfengasse 105, 4830 Hallstatt, Austria

除咗影相打卡外，其實哈爾施塔特仲有好多嘢玩，例如坐纜車到觀景台俯瞰整個城鎮，仲可以走到Skywalk挑戰膽量。記得要去埋World Heritage View打卡，又係另一個靚角度去欣賞哈爾施塔特。登山纜車票可上官網預訂，慳返到場排隊買飛嘅時間。

行完Skywalk可以到鹽洞tour參觀，我同團友對此不太感興趣，所以冇去到，不過如果大家有興趣的話，可以買來回纜車＋鹽洞tour套票組合，會比較抵，成人價錢為34歐元（約306港元）。如果淨係坐纜車來回，車費則是20歐元（約180港元）。去之前記得先上官網check下鹽洞開放時間，唔係就白行一趟。

鹽洞官網 : https://www.salzwelten.at/en/

蘇跑後記：哈爾施塔特真係名符其實嘅世界文化遺產，對於零死角嘅美景真係百看不厭。對於當地人嘅保育智慧同利用上天賜畀佢地美好嘅資源，真係感到佩服。我認為奧地利嘅Hallstatt真係人生必到嘅地方，包你唔會失望。

奧地利哈爾施塔特基本資料
地理位置：奧地利是中歐的一個多山小國，哈爾施塔特位於奧地利薩爾茨卡默古特地區一個村莊，位於哈爾施塔特湖湖畔，海拔高度約511米
時區：冬令時間比香港慢7小時；夏令慢8小時
簽證：持有香港特區護照可免簽證，並停留不多於3個月
官方語言：德文
民族：奧地利人是日耳曼民族其中一個分支
主要宗教：基督教
氣候：奧地利屬於大陸性氣候，冬季寒冷，經常下雨有霧，冬季最低溫度介於2°C至-15°C之間，夏季短暫，氣溫通常介於20°C至30°C之間

撰文及攝影：蘇兒（Zoe） 
鍾情於打排球同跑步嘅女生，閒時環遊世界發掘美景。期望可以跑晒世界上有名嘅馬拉松。