由小編出世以嚟，每年中秋節都係放翌日，而唔係放正日！直到依家，都會成日諗點解新年、端午節、聖誕節、復活節等等，都係放正日，只有中秋節唔係！
有人話：「中秋正日夜晚比你去玩、賞月、玩燈籠，一定玩到好夜！所以專登放翌日畀你休息！」
不過原來呢個講法係真～
研究香港歷史嘅團體「港識多史」嘅成員喺接受傳媒訪問嘅時候，就由中秋假嘅由來講起！
英治時期，因為公營機構同銀行文職工作都有英籍員工，所以英國人就以「中西合璧」嘅方式制訂公眾假期，同時包括中式農曆新年同西式聖誕節等，不過中秋節就唔屬於公眾假期喇！
「香港喺1962年開始先有中秋假。當年港府遵從『國際勞工公約』有薪假期條款，喺《工業僱傭條例》列明，工廠工人/月薪700元以下嘅非勞動工人，享有每年6日嘅法定有薪假期，分別係：農曆年初一、農曆除夕/年初二、清明節、端午節、中秋節、冬至或元旦。又因為實施嘅對象係勞動階層，所以法定假日又叫「勞工假」。
不過喺六七暴動後港英政府要檢視政策，所以喺1968年調整《僱傭條例》，同時將中秋節正日假期改為翌日放，以便華人喺中秋節夜晚慶祝、賞月，第二日就休息。
所以話，中秋翌日先放假係同我哋嘅慶祝習慣有關。有網民就補充，香港古舊慶祝中秋儀式繁複，要拜神，將月餅、水果、點心等擺上檯面供奉月娘。要等到半夜供奉完畢，小朋友先食嘢，所以佢哋中秋節嗰晚會好夜瞓！如果第二日唔放假，小朋友返學就會好攰、好眼瞓！
以前拜月有個寓意：有個圓滿美好嘅願望--待出嫁姑娘拜月嘅重要心願就係尋求一嘅好丈夫！依家？香港人相信自己多過神佛，自己幸福自己爭取嘛！
澳門同香港一樣放中秋節翌日；台灣同內地就係放中秋節正日！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0