千萬訂閱科技YouTuber斥資五千美金砌機 隨機送路人

早前台北國際電腦節期間，擁有千萬訂閱嘅加拿大科技YouTuber Linus Gabriel Sebastian (YT頻道：Linus Tech Tips)都有出席，出席完電腦節之後，佢抽時間去咗台北專賣電子產品嘅光華商場，但佢並唔係就咁行街咁簡單，斥資咗約5,000美金隨機搵咗間鋪頭砌機，最後仲將部主機送咗俾路人，令觀眾都十分羨慕啊！

Linus嘅頻道平時做開科技產品測試，所以佢對科技產品都十分熟悉㗎啦，而呢日佢就扮成一個科技白癡，去到商場以5,000美金嘅預算，叫店家幫佢砌機，最後店家就幫佢以5,159美金（約港幣$40,275）砌咗部機。經過三日組裝後，Linus就將部機拎返酒店進行開箱，Linus大讚店家嘅防護包裝做得好好，電腦嘅內部裝置亦冇馬虎，雖然佢對本來電腦嘅運行速度唔夠滿意，但經過佢自己改裝之後，電腦成功以最大速度運行，總括嚟講係完全對得起個價錢！

雖然部機係Linus出錢買，但最後佢冇拎走部機，佢手捧部機出去街頭，將部機送咗俾一位認得出佢嘅中學生。嗰位中學生自稱係Linus嘅fans，當佢知道Linus要送部電腦俾佢嘅時候驚訝到呆咗，唔敢相信啊！最搞笑係當Linus送位中學生返屋企嘅時候見到佢媽媽，佢媽媽就講笑咁話「將你嘅幸運擺喺讀書到啦！」睇到呢到，我只能夠講聲「這些機會不屬於我！」希望如果第時Linus有機會嚟到香港，會再大放送啦！

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/