【美食地淘】2021年度最愛: Ryota Kappou Modern

小妹第一次喺呢度出文，請多多指教🤗！先黎送上2021年最愛餐廳推介啦！

要揀上年小妹嘅最愛、最impressive餐廳，一定非Ryota Kappou Modern莫屬。餐廳走高級割烹路線，喺2020年摘星🌟，成為香港米芝蓮一星餐廳。主廚兼澤良太先生持「Simplicity Excellence」烹飪理念，以簡單、高質同當造食材，加入創意及技術，帶出食材最自然的原味。

是日Menu

餐廳Menu 會按時節更換，當日Menu一共有8菜，先以「鵝肝最中餅」作為前奏，係日本和菓子嘅一種，傳統配上甜餡，主廚改為用鵝肝，以十年陳味醂以及和三盆糖醃製；再加上焦糖啫喱、開心果醬、紅桑子、柚子皮、紫蘇葉，成為「鵝肝最中餅」。呢道菜味道層次豐富，但每一樣配搭都剛好：有濃郁嘅鵝肝、陳味醂同三盆糖嘅甜，焦糖啫喱同柚子皮嘅清新感，開心果嘅果仁香；而底嘅脆餅同鵝肝形成口感對比，絕對配得上招牌菜之地位🤩。

鮑魚茶碗蒸，將啡金菇、鮑魚菇、松茸加入松露同鮑魚都切成粒狀炒香後，再製成茶碗蒸。呢道菜看似簡單，但就非常好食，蒸蛋吸收曬鮑魚同菇嘅精華，鮮味十足，連唔食菇嘅朋友都清光就知道幾好味🤣

京都白味噌龍蝦🥣用上北海道新鮮龍蝦，搭配京都白面豉、蝦頭、蝦殼🦐同秘製調料調配而成，龍蝦鮮味滿分。龍蝦煮至半熟，蝦肉軟滑得黎非常爽口，口感特別又好味得無法形容🤭！

季節刺身拼盤有海帶水母、拖蘿配山藥泥、魚子配生蝦。刺身非常新鮮，不過款配搭有別一般刺身拼盤，唔係小妹欣賞嘅款式；相反，之後嘅「完美刺身飯」令人有驚喜。海膽味濃而且口感很Creamy，配上和牛嘅油香和魷魚嘅口感，三者配合得剛剛好，份量又剛好，食完唔會好濟但又令人回味🤭，配上佢「完美刺身飯」嘅名字！

小妹唔鍾意食🐟鯖魚，生嘅鯖魚更加未試過，不過呢個鯖魚壽司卷令我徹底改觀。鯖魚卷閃令令，賣相好靚。魚質完全唔係平日燒鯖魚個種鞋身嘅口感，肉質軟淋；中間夾咗一片薄到透光，味道似酸瓜的薄片，再加上紫菜，令口感更有層次。

主熱食有兩款，分別係燒日本甘鯛配百合根同近江和牛。主廚用備長炭將甘鯛魚鱗炸至鬆脆，呈金黃色，咬落有清脆的卡卡聲，脆到完全唔覺得食緊魚鱗。肉質則非常柔嫩帶魚肉汁，跟鬆脆的魚鱗成鮮明嘅對比，配百合根蓉，甜甜的，好好食~這道菜有驚艷到小妹🤩！

光看這件近江和牛嘅色澤同油脂分佈已經心心眼。以壽喜燒作靈感，將牛肉低溫烘炸至半熟，邊邊炸到微脆，再蘸上蛋汁同壽喜燒甜醬一齊食，外脆內嫩滑。可惜呢道菜係安排係燒日本甘鯛之後，由於燒甘鯛表現太出色，令和牛有點比下去。

主菜後會serve一碟沙律，清清味蕾後，再品嚐金目鯛烏冬。五島烏冬無論外表同口感都同認知嘅烏冬好唔同，非常幼細軟滑，略嫌缺乏了稻庭烏冬嘅彈牙口感。金目鯛魚肉嫩滑，唯一係只有一片肉，份量有點不夠。不過整體味道很清甜，亦令你更有飽腹感，作為最後嘅菜式很不錯。

甜品分別有蕨餅同甘薯泡芙兩款。作為日本餐廳，蕨餅令小妹有點失望，出奇地沒有該有嘅嚼勁，有點失分。相反甘薯泡芙味道唔錯，脆脆嘅泡芙，加入甘薯蓉、沖繩黑糖同雪糕一齊食，味道很夾。

作為米芝蓮一星餐廳，氣氛和presentation 都好重要，呢度幾乎每一道菜道發揮水準，要挑選小妹最愛嘅都有d困難；而且presentation 都好有心思，好似藝術品咁，眼睛都可以「 食」 埋一份。 餐廳嘅氣氛同服務都好好，每次上菜都耐心介紹菜式，值得一讚。小妹好少喺香港食米芝蓮，因為感覺通常都overpriced；呢度雖然唔係親民嘅價格，但食完會令你有「捧住肚子走」嘅滿足感，完全無「貴夾唔飽」嘅感覺，超推介大家喺重要嘅慶祝日子黎試一試，絕不會令你失望。

Ryota Kappou Modern 
推介度：❤🖤❤🖤❤🖤❤🖤❤
💰：$2480/person
地址：香港中環安蘭街18號21樓

by 淘 (Follow @taltalsfooddating ~)

          View this post on Instagram                      

A post shared by 🍑TaL TaL's Food Dating (@taltalsfooddating)